2015-11-14T140313Z_959536178_GF20000059128_RTRMADP_3_FRANCE-SHOOTING-SPAIN

نێچیرڤان بارزانى پشتگیریی گه‌لی فه‌ره‌نسا ده‌كات و ده‌ڵێت شكست به‌ تیرۆریزم دێت

به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، له‌ په‌یامیكدا به‌بۆنه‌ى هێرشه‌ تیرۆرستییه‌كانى دوێنێ شه‌وى پاریسه‌وه‌، پشگیریی گه‌لی فه‌ره‌نسا ده‌كات و ده‌ڵێت شكست به‌ تیرۆریزم دێت. ئه‌مه‌ ده‌قى په‌یامه‌كه‌یه‌تى:

به‌ دڵێكی پڕ په‌ژاره‌وه‌ هه‌واڵى هێرشه‌ ترسناكه‌كانى دژی خه‌ڵكی پاریسم بیست، له‌ ناخی دڵه‌وه‌ سه‌ره‌خۆشییان لێده‌كه‌م و ئه‌وپه‌ڕى پشتگیریی خۆم و گه‌لی كوردستانیان پێ ڕاده‌گه‌یه‌نم.

له‌ شه‌ڕى دژى تیرۆریزمدا، فه‌ره‌نسا لێبڕاوانه‌ له‌گه‌ڵ هه‌رێمی كوردستان وه‌ستاوه‌ و له شه‌ڕی ئه‌واندا، ئێمه‌ش له‌گه‌ڵیانین. ته‌حه‌دای سه‌ركه‌وتن به‌سه‌ر ئه‌م هه‌ڕه‌شه‌یه‌دا زۆر گه‌ل و نه‌ته‌وه‌ له‌ سه‌رتاسه‌ری جیهاندا یه‌ك ده‌خات، ئه‌مه‌ تێكۆشانى شارستانییه‌ت دژ به‌ ده‌مارگیری و دڕنده‌ییه‌.

هێرشی له‌مجۆره‌ به‌ مه‌به‌ستی بڵاوكردنه‌وه‌ی ترسه‌، به‌ڵام كۆمه‌ڵگه‌ی نێوده‌وڵه‌تی ده‌بێت به‌وپه‌ڕی بڕوابه‌خۆبوونه‌وه‌ وه‌ڵام بداته‌وه‌. له‌ ڕاستیدا، ئه‌م تراژیدیایه‌ ڕۆژێك پاش شكستی گه‌وره‌ی داعش له‌ شنگال هات، ئێمه‌ ده‌توانین و ده‌بێت شكست به‌ تیرۆریزم بهێنین.

نێچیرڤان بارزانى
سه‌رۆك وه‌زیرانى هه‌رێمى كوردستان
14/11/2015

NB_kongresmanani_USA__2015_11_07_h23m45s33__SE

كۆنگرێسی ئەمەریكا كار بۆ بەجینۆسایدناساندنی نەهامەتییەكانی ئێزیدی و كرستیانەكان دەكات

ئێوارەی ئەمڕۆ شەممە 7/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە شاندێكی كۆنگرێسی ئەمەریكا بە سەرۆكایەتیی كۆنگرێسمانان دانا رۆهربێچەر و ستیڤ كینگ، كرد.

لە دیدارێكدا شاندی میوان سوپاس و پێزانینی خۆیان بۆ خەڵك و حكوومەت و پێشمەرگەی كوردستان دەربڕی بۆ خۆڕاگرییان لە بەرامبەر تیرۆر و كێشەی بڕینی بودجە لە لایەن بەغداوە و پێشوازیكردن لە ژمارەیەكی زۆری ئاوارە و پەنابەرانی دەستی تیرۆر و هاوكارییكردنیان، لەمبارەیەشەوە سوپاسگوزاریی خەڵكی ئەمەریكایان بۆ هێزی پێشمەرگە و خەڵك و حكوومەتی هەرێمی كوردستان پیشان دا.

دووپاتیشیان كردەوە كە لای خۆیانەوە هەوڵ دەدەن كۆمەڵگەی نێودەوڵەتی بە گشتی و بە تایبەتی ئەمەریكا لە پێشكەشكردنی هاوكاریی سەربازی بۆ هێزی پێشمەرگە بەردەوام بن. هەروەها ئاشكرایان كرد كە ئەوان ڕەشنووسی پڕۆژەیاسایەكیان پێشكەش بە كۆنگرێسی وڵاتەكەیان كردووە بۆ ئەوەی ئەو كارەساتە گەورەیەی بەسەر ئێزدییەكان و كرستیانەكان هاتووە، وەك جینۆساید بناسێنرێ.

لای خۆیەوە بەڕێز سەرۆك وەزیرانی هەرێمی كوردستان سوپاسی هەڵوێستی شاندی میوان و وڵاتانی بەشدار لە هاوپەیمانیی دژی تیرۆرستانی داعش بە گشتی و ئەمەریكا بە تایبەتی  كرد، كە لەگەڵ هێرش و هەڕەشەی داعش هاوكاریی هێزی پێشمەرگەیان كرد، بەڵام بۆ بنبڕكردنی یەكجاریی ئەم مەترسییە پێشمەرگە پێویستی بە ڕاهێنان و چەكی زیاتر و نوێتر هەیە و هیوای خواست هاوكاریی زیاتری هێزی پێشمەرگە و خەڵكی كوردستان بكرێت، چونكە تەنیا پێشمەرگەیە لەسەر ئەرزی واقع شكستی بە گشت پیلانەكانی تیرۆرستان هێناوە.

هەروەها دەستخۆشی لە ڕەشنووسی پڕۆژەیاسای بەجینۆسایدناساندنی ئەو كارەساتانەی بەسەر ئێزدی و كرستیانەكان هاتوون، كرد و ئاماژەی بەوە دا ئەمە یەكێكە لە داخوازە هەرە سەرەكییەكانی حكوومەتی هەرێمی كوردستان. هەروەك جەختی لە بەردەوامیی پاراستن و هاوكاریكردنی هەموو ئەو ئاوارە و پەنابەرانە كردەوە كە لە ترسی تیرۆر ڕوویان لە هەرێمی كوردستان كردووە، بەڵام بە هۆی قەیرانی داراییەوە حكوومەتی هەرێمی كوردستان پێویستی بە پشتگیری و هاوكاریی نێودەوڵەتی هەیە بۆ ئەوەی خزمەتی زیاتریان پێشكەش بكرێت.

تاوتوێكردنی پەیوەندییەكانی نێوان هەرێمی كوردستان و وڵاتانی ناوچەكە و بە تایبەتی پەیوەندییەكانی نێوان هەولێر و بەغدا، لایەنێكی دیكەی دیدارەكە بوو.

NB_sharewani_paris__2015_10_29_h23m4s37__SE

پارێزگاى هه‌ولێر و پاریس په‌یوه‌ندى ده‌به‌ستن

ئێوارەی ئەمڕۆ پێنجشەممە 29/10/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە خاتوو ئان هیدالگۆ سەرۆكی شارەوانیی پاریسی پایتەختی فەڕەنسا و شاندێكی یاوەری كرد.

لە دیدارێكدا خاتوو هیدالگۆ دڵخۆشیی خۆی بە سەردانی هەرێمی كوردستان دەربڕی و ئاماژەی بەوە دا كە فەڕەنسا لە هەموو قۆناغەكاندا پشتگیری له‌ دۆزی كورد كردووه‌ و لە پشتگیرییەكانیشیان بەردەوام دەبن بەتایبەتی كه‌ ئێستا هەرێمی كوردستان ڕووبەڕووی دڕندەترین گرووپی تیرۆرستیی جیهان بووەتەوە، سەرسامیی خۆیشی بەرامبەر قارەمانیه‌تیی و نەبەردیی پێشمەرگە لە دژی تیرۆرستانی داعش پیشان دا. هه‌روه‌ها ئاماژەى بەوە دا كە حكوومەتی هەرێمی كوردستان توانی لە كاتێكی كورتدا پێشكەوتنێكی بەرچاو لە هەموو بوارەكاندا بهێنێتە ئاراوە و لەم بارەیەشەوە ڕۆڵی بەڕێز نێچیرڤان بارزانی سەرۆك وەزیرانی هەرێمی كوردستانی بەرز نرخاند.

لە بەشێكی دیكەی قسەكانیدا هەوڵ و هەنگاوەكانی خەڵك و حكوومەتی هەرێمی كوردستانی بەرز نرخاند كە سەرباری قەیرانی دارایی و ئابووری، پێشوازیان لە ژمارەیەكی یەكجار زۆری ئاوارە و پەنابەرانی دەستی تیرۆر كردووە و بە باشترین شێوە خزمەتیان كردوون و دووپاتی كردەوە كە پێویستە كۆمەڵگەی نێودەوڵەتی بۆ باشتركردنی ژیانی ئاوارە و پەنابەران، هاوكاریی زیاتر پێشكەش بە هەرێمی كوردستان بكات. هەروەك ئاشكرای كرد كە دەكرێ پەیوەندییەكی تایبەت لە نێوان پارێزگای هەولێر و پاریس هەبێت بۆ ئەوەی سوود لە ئەزموون و شارەزاییی شارەوانیی پاریس وەربگیرێت و لەمبارەیەشەوە ئامادەییی خۆی بۆ هەر هاوكاری و هەماهەنگییەك دەربڕی.

لای خۆیەوە بەڕێز سەرۆك وەزیران سوپاسی ئەو سەردانە و تێبینی و سەرنجەكانی شارەداری پاریس كرد و باسی لە پشتگیری و هاوكارییەكانی فەڕەنسا بۆ گەلی كورد لە كاتە سەختەكاندا كرد و هیوای خواست دروستكردنی پەیوەندیی نێوان پارێزگای هەولێر و پاریس بكەوێتە سەر ڕێچكەی خۆی. هەروەك باسی لە گرفتەكانی ناوخۆ و پرسی ئاوارەكان و شەڕی دژی تیرۆرستانی داعش و پەیوەندییەكانی نێوان هەولێر و بەغدا و بارودۆخی ناوچەكە لە هەموو ڕوویه‌كەوە كرد.

لەبارەی پەیوەندییە ئابوورییەكانیشەوە، بەرێزیان جەختی لەوە كردەوە كە هەرێمی كوردستان پێشوازی لە كۆمپانیا و وەبەرهێنەرانی فەڕەنسا دەكات بۆ ئەنجامدانی سەرمایەگوزاری و وەبەرهێنان و پێشخستنی بواری ئابووری لە هەرێمی كوردستان و بۆ ئەم مەبەستەش هەموو ئاسانكارى و هاوكارییەك پێشكەش دەكەن، هەروەك بوونی قوتابخانە فەڕەنسییه‌كانی لە هەرێمی كوردستان بەرز نرخاند كە بە شێوەیەكی ڕێكوپێك و سەركەوتوو كارەكانیان ئەنجام دەدەن.

NB_kunsili_elmanya__2015_10_25_h14m27s54__SE

كونسڵی ئەڵمانیا: لە داهاتوویەكی نزیكدا هەرێمی كوردستان دەبێتە شوێنێكی گونجاو بۆ سەرمایەگوزاری

نیوەڕۆی ئەمڕۆ یەكشەممە 25/10/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز مارك ئایشهۆڕن كونسڵی گشتیی نوێی ئەڵمانیا لە هەرێمی كوردستان كرد.

لە دێدارێكدا بەڕێز ئایشهۆڕن خۆشحاڵیی خۆی بە دیداری لەگەڵ بەڕێز سەرۆك وەزیرانی هەرێمی كوردستان دەربڕی و ئاماژەی بە پەیوەندییە پتەوەكانی نێوان ئەڵمانیا و هەرێمی كوردستان كرد و دووپاتى كرده‌وه‌ حكوومەتی ئەڵمانیا هەوڵی داوە لە هەموو قۆناغەكاندا هاوكاریی هەرێمی كوردستان بكات بەتایبەتی لە شەڕی دژی تیرۆردا كە پێشمەرگەی كوردستان توانیویەتی بوێرانە ڕووبەڕووی ببێتەوە و پلانەكانیان تێك بشكێنێت و هەموو جیهان لەو مەترسییە دوور بخاتەوە، ئەمەش بووە هۆكار بۆ ئه‌وه‌ى ئەڵمانیا بڕیارێكی دەگمەن لە مێژووی خۆیدا بدات كە یارمەتیی سەربازی بنێرێتە دەرەوەی وڵاتەكەی و لە هاوكارییەكانیشیان بەردەوام دەبن.

هه‌روه‌ها ڕوونى كرده‌وه‌ كە تیمی مەشقكارانی سەربازیی ئەڵمانیا خۆشحاڵن بە ئاستبەرزیی پێشمەرگە لە مەیدانەكانی مەشق و ڕاهێناندا و باسی له‌ بواری ئابووریی هەرێمی كوردستانیش كرد و دووپاتی كردەوە كە لە داهاتوویەكی نزیكدا هەرێمی كوردستان دەبێتە شوێنێكی گونجاو بۆ سەرمایەگوزاری و هەوڵ دەدەن بارودۆخی هەرێمی كوردستان بۆ سەرمایەگوزار و كۆمپانیاكانی ئەڵمانیا ڕوون بكەنەوە، بۆ ئەوەی كاری وەبەرهێنان لە هەرێمی كوردستان ئەنجام بدەن.

لای خۆیەوە بەڕێز نێچیرڤان بارزانى سوپاسی ئەو سەردانەی كرد و هیوای سەركەوتنی بۆ خواست لە ئەركە نوێكەیدا، هەروەها جەختی لە پته‌وكردنى زیاترى پەیوەندییەكانی نێوان هەرێمی كوردستان و ئەڵمانیا كردەوە و سوپاسی حكوومەتی ئەڵمانیای كرد بۆ بڕیارى بوێرانەی ناردنی هاوكاریی سەربازی بۆ پێشمەرگەی كوردستان، بە تایبەتی ناردنی هەندێك چەك كە كاریگەریی ڕاستەخۆی لەسەر مەیدانی جەنگ هەبووە و بۆتە هۆكار بۆ ئه‌وه‌ى پارسەنگی هێز بۆ بەرژوەندیی پێشمەرگە بشكێتەوە، بۆیە حكوومەت و خەڵكی هەرێمی كوردستان بەڕێزەوە سەیری ئەم هاوكارییانە دەكەن. هه‌روه‌هاهیوای خواست پەیوەندییەكانى هه‌ردوولا لە هەموو بوارەكاندا بەرەو پێشەوە بچن.

تاوتوێكردنى بارودۆخی هەرێمی كوردستان و پەیوەندییەكانی نێوان هەولێر و بەغدا، لایەنێكی دیكەی دیدارەكە بوو و لەمبارەیەشەوە بەڕێز نێچیرڤان بارزانی ئامادەییی حكوومەتی هەرێمی دەربڕی كە سەردانی بەغدا بكەن بۆئ ەوەی ئەو گرفتانەی لە نێوان هەردوولادا هەن بە ڕێگەی گفتوگۆ و دیالۆگ چارەسەر بكرێن.

NB_laricani__2015_10_18_h16m5s46__SE

نێچیرڤان بارزانی و لاریجانی، دۆخی عێراق و هەرێمی كوردستان تاوتوێ دەكەن

سەرلەبەیانیی ئەمڕۆ یەكشەممە 18/10/2015 لە تارانی پایتەختی كۆماری ئیسلامیی ئێران، بەڕێز نێچیرڤان بارزانی سەرۆك وەزیرانی هەرێمی كوردستان لەلایەن بەڕێز عەلی لاریجانی سەرۆكی پەرلەمانی ئێرانەوە پێشوازی لێ كرا.

لە دیدارێكدا سەرەتا بەڕێز لاریجانی خۆشحاڵیی خۆی بە سەردانی بەڕێز نێچیرڤان بارزانی دەربڕی. دواتر باسی لە بارودۆخی گشتیی عێراق و ناوچەكە و پەیوەندییەكانی نێوان هەرێمی كوردستان و كۆماری ئیسلامیی ئێران كرد و ئاماژەی بەوە دا نابێت ڕێگا بدرێت ئاژاوە و ناكۆكی لە هەرێمی كوردستان دروست ببێت كە ناوچەیەكی ئارامە و دەبێت هەوڵ بدرێت بە گفتوگۆ و دیالۆگ كێشەكان چارەسەر بكرێن و ئەولەویەتی كارەكان ڕووبەڕووبوونەوەی مەترسیی تیرۆر و كێشە داراییەكان بێت.

جەختی لەوەش كردەوە كە كۆماری ئیسلامیی ئێران لە هەموو كاتەكاندا پاڵپشت و هاوكاری هەرێمی كوردستان بووە و لەو هاوكارییەشی بەردەوام دەبێت. لە بەشێكی دیكەی قەسەكانیدا باسی لە پەیوەندییەكانی نێوان هەرێمی كوردستان و حكوومەتی عێراقی فیدرال كرد و هیوای خواست كێشەكانی نێوان هەردوولا بە گفتوگۆ و لێكگەیشتن چارەسەر بكرێن.

لای خۆیەوە بەڕێز سەرۆك وەزیرانی هەرێمی كوردستان سوپاسی ئەو پێشوازییەی كرد و هاوكارییەكانی كۆماری ئیسلامیی ئێرانیشی بۆ هەرێم بەرز نرخاند. دووپاتیشی كردەوە ئەو هەنگاوانەی ئەم دواییە هەرێمی كوردستان و حكوومەتی هەرێم ناویانە، بۆ هێوركردنەوەی بارودۆخی هەرێم بووە و گفتوگۆ و دیالۆگیش لە نێوان لایەنە سیاسییەكانی هەرێمی كوردستاندا بەردەوام دەبێت بۆ چارەسەر كردنی گرفتەكانی ناوخۆ.

بەڕێزیان هەروەها دووپاتی كردەوە كە هەوڵ و تەقەلاكان بۆ لەناوبردنی مەترسیی داعش بەردەوامن. جەختی لەوەش كردەوە كە هەرێمی كوردستان بایەخێكی زۆر بە پەیوەندییەكانی لەگەڵ كۆماری ئیسلامیی ئێران دەدات و هیوای بەهێزتركردنی پەیوەندییەكانی خواست. دەربارەی پەیوەندییەكانی نێوان هەولێر و بەغداش جەختی لەوە كردەوە كە هەوڵەكان بەردەوام دەبن بۆئەوەی بە ڕێگەی دیالۆگ و گفتوگۆ كێشانەكانی نێوان هەردوولا چارەسەر بكرێن.

KRP_Emblem-2__2015_10_04_h15m57s12__HO

راگەیێندراوێك لە سەرۆكایەتیی هەرێمی كوردستان ده‌رباره‌ی رۆلی روسیا له‌ شه‌ڕ دژ به‌ داعش

لە شەڕی دژی تیرۆریستانی داعشدا هێزی پێشمەرگەی كوردستان هێزی سەرەكیی ڕووبەڕووبوونەوەی ئەو ڕێكخراوە بووە لەسەر ئەرزی واقع و توانیویەتی سەركەوتنی بەرچاو لە بەرانبەر داعش مسۆگەر بكات. لەم شەڕەدا هەرێمی كوردستان هاوبەشێكی كاریگەرە لە هاوپەیمانێتیی نێودەوڵەتی بە سەرۆكایەتیی ئەمەریكا لە عێراق.

هەرێمی كوردستان سوپاسی هەر دەوڵەت یان لایەنێك دەكات كە لە شەڕی دژی تیرۆریستانی داعش یارمەتیی پێشمەرگە بدات و لەم ڕووەوە پێشوازییش لە وڵاتی ڕووسیا دەكات ئەگەر لە شەڕی دژی تیرۆریستانی داعش هاوكاریی پێشمەرگە بكات.

سەبارەت بە هەوڵە جیهانییەكان بۆ تێكشكاندنی ڕێكخراوی تیرۆریستیی داعش، ئەگەر هەماهەنگی و كاری هاوبەش لەنێوان هاوپەیمانێتیی نێودەوڵەتی و وڵاتی ڕووسیا لە دژی داعش هەبێت ئەوە ئەنجامی باشتری لێدەكەوێتەوە.

سەرۆكایەتیی هەرێمی كوردستان

PMBarzaniTalksToReporters27Sep15__2015_09_29_h14m31s25__HO

نێچیرڤان بارزانى: له‌ چاكسازى به‌رده‌وام ده‌بین

ئێوارەی ئەمڕۆ یەكشەممە 27/9/2015 و دوای بەشداریكردنی لە ڕێوڕەسمی دەستبەکاربوونی پاتریارک گورگیسی سێیەم سڵێوە پاتریاركی كەنیسەی ڕۆژهەڵاتی ئاشووری و گواستنەوەی كەنیسەی ڕۆژهەڵات لە ئەمەریكاوە بۆ هه‌ولێر، بەڕێز نێچیرڤان بارزانی سەرۆك وەزیرانی هەرێمی كوردستان وه‌ڵامى چه‌ند پرسیارێكى ڕۆژنامه‌نووسانى دایه‌وه‌.

لە وه‌ڵامى پرسیارێكدا گواستنەوە و گەڕانەوەی كەنیسەی ڕۆژهەڵاتی ئاشووری لە ئەمەریكاوە بۆ هەرێمی كوردستان دوای هەشتا ساڵ، بە ڕۆژێكی مێژوویی بۆ هەرێمی كوردستان و كەنیسەی ڕۆژهەڵاتی ئاشووری و پەیڕەوانی ئەو كەنیسەیە لە قەڵەم دا و ئەمەشی بۆ ئارامی و پێكەوەژیانی برایانە و ئاشتیی نێوان هەموو پێكهاتە نەتەوەیی و ئایینییەكانی هەرێمی كوردستان گەڕاندەوە و بە سەرەتایەكی گرنگ و جێی شانازی بۆ هەرێمی كوردستان ناو‌زه‌د‌ كرد.

سەبارەت بەو ئاوارە و پەنابەرانەی لە ترسی تیرۆر ڕوویان لە هەرێمی كوردستان كردووە، بەرێزیان ئاماژەی بەوە كرد كە نزیكەی ملیۆنێك و حەوتسەد هەزار ئاوارە و پەنابەر ڕوویان لە هەرێمی كوردستان كردووە و ئەوەی لە تواناى حكوومەتی هەرێمی كوردستاندا بووبێت بۆ ئەو ئاوارە و پەنابەرانە كردوویەتی و بەردەوامیش دەبێت لە هاوكاریكردنیان سەرەڕای ئەو بارودۆخە خراپە داراییه‌ی كە ڕووبەڕووی هەرێمی كوردستان بووەتەوە.

ده‌رباره‌ى ناردنی نەوتی هەرێمی كوردستان و ئەو كێشانەی لەبەردەم ناردنی نەوت دروست دەكرێن، ڕوونی كردەوە كە تاكە ڕێگە بۆ هەناردەكردنی نەوتی هەرێمی كوردستان بۆڕیی نەوتی توركیایە و كاتێك ئەو بۆڕیەش دەتەقێنرێتەوە یان هەوڵ دەدرێت لەناو توركیا نەوتی لێ دەربهێندرێت، زیانێكی گەورە بەر هەرێمی كوردستان دەكەوێت. هیوای خواست ئەو لایەنانەی ئەم كارانە ئەنجام دەدەن لەوە تێبگەن كە ئەم بۆڕییە نەوتە شادەماری بژێوی خەڵكی كوردستانە و واز لەو كارە ناشرینانە بهێنن و هاوكاربن بۆ ئەوەی جارێكی دیكە ئەو كارە دووبارە نەبێتەوە و هەوڵەكانیشیان لەگەڵ حكوومەتی توركیا بەردەوامە و لە دیدار و كۆبوونەوەكان لەگەڵ بەرپرساتی توركیا جەختیان لەوە كردووەتەوە زیاتر گرنگیی بەوە بدرێت ئەو بۆڕییە نەوتە بپارێزرێت.

سەبارەت بە كۆبوونەوە پێنج قۆڵییەكان بۆ چارەسەركردنی پرسی سەرۆكایەتیی هەرێمی كوردستان، بەڕێزیان دووپاتی كردەوە كە دوا پەیامی بەڕێز مەسعوود بارزانی سەرۆكی هەرێمی كوردستان لەبارەی ئەو پرسەوە ئاشكرایە و هەموو لایەنەكان هەوڵی ئەوە دەدەن بگەن بە ڕێككەوتن و هیوای خواست لە كۆبوونەوەی شەشی مانگی داهاتوودا هەموو لایەنەكان بگەنە ڕێككەوتنێك كە لە بەرژوەندیی هەرێمی كوردستاندا بێت.

سەبارەت بە هاتنی بەرێز حسێن شەهرستانی نوێنەری بەرێز حەیدەر عەبادی سەرۆك وەزیرانی عێراقی فیدراڵ بۆ هەرێمی كوردستان، بەڕێز سەرۆك وەزیرانی هەرێمی كوردستان ئاشكرای كرد كە بەڕێز شەهرستانی بە سەردانێكی ئاسایی بە مەبەستی بەشداریكردن لە ڕێوڕەسمی گواستنەوەی كەنیسەی ڕۆژهەڵاتی ئاشووری بۆ هەرێمی كوردستان هاتۆتە هەرێم و كۆبوونەوەشیان لەگەڵی هەبووە.

لەبارەی چاكسازییەكانیشەوە دووپاتی كردەوە كە هەر لە سەرەتای دورتسبوونی كابینەی هەشتەمی حكوومەتی هەرێمی كوردستانەوە ئەوان هەوڵیان داوە بەپێی چەند پرۆگرامێك دەست بە چاكسازی بكەن و وەزارەتەكانیش یەك بە یەك خەرێكی چاكسازین و ئەمەشی بە كارێكی پێویست زانی. جەختی لەوەش كردەوە كە دەبێت پرۆسەی چاكسازی بەردەوام بێت.

لەبارەی لێپرسینەوە و چوونی وەزیرەكانی حكوومەتیشه‌وه‌ بۆ پەرلەمانی كوردستان، دووپاتی كردەوە كە بەپێی عورف و یاساكان دەبێت ڕەزامەندیی سەرۆكایەتیی ئەنجومەنی وەزیران لەوبارەیەوە وەربگیرێت دواتر وەزیرەكان بچنە پەرلەمان.

دەربارەی ئازادكردنی شاری مووسڵ لە دەستی تیرۆرستانی داعش و بەشداریكردنی هێزی پێشمەرگە لە ئازادكردنەوەی ئەو شارەدا، بەڕێز نێچیرڤان بارزانی ئاماژەی بەوە كرد كە ئازادكردنی شاری مووسڵ بۆ هەرێمی كوردستان كارێكی گرنگە، چونكە پەیوەندی بە ئاسایشی هەرێمی كوردستانەوە هەیە، بەڵام تا ئێستا پلانێكی جددی بۆ ئازادكردنەوەی شاری مووسڵ دانەنراوە و ئێستا بیر لە دانانی ئەو پلانە دەكرێتەوە و هەر كاتێك پلانەكە ئامادە كرا و ئەوان پلانەكەیان بینی، ئەو كات وەك هەرێمی كوردستان بڕیاری بەشداریكردن، یان بەشدارینەكردنی پێشمەرگە لە شەڕی ئازادكردنەوەی مووسڵدا دەدەن.

لە وەڵامی پرسیارێكدا سەبارەت بەو بژاردانەی لەبارەی هەڵبژاردنی سەرۆكی هەرێمی كوردستانه‌وه‌ لەلایەن خەڵك یان پەرلەمانی كوردستانەوە لەلایەن چوار لایەنەكه‌وە خراونەتە ڕوو، بەرێز نێچیرڤان بارزانی ڕایگەیاند بژاردەكان سەیرن، چونكە باس لەوە دەكەن گەر سەرۆك لەلایەن خەڵكەوە هەڵبژێردرێت دەبێت دەسەڵاتێكی كەمی بێت و گەر لەلایەن پەرلەمانیشەوە هەڵبژێردرێت دەستەڵاتێكی زۆری دەبێت، كە پێویستە پێچەوانە بكرێتەوە، چونكە ئەو سەرۆكەی ڕاستەوخۆ لەناو خەڵكەوە هەڵدەبژێردرێت پێویستە دەستەڵاتی زیاتر بێت لەوەی كە لەلایەن پەرلەمانەوە هەڵدەبژێردرێت، لەبەرئەوەی ڕاستەوخۆ شەرعیەت لە گەلەكەیەوە وەردەگرێت.

ئەوەشی ئاشكرا كرد كە مەسەلەكە هیچ پەیوەندیی بە بەرێز مەسعوود بارزانییەوە نییە هەروەك لە دوا پەیامیدا باسی كردووە و هیوای خواست بە شێوەیەكی واقعبینانە بیر لە چارەسەری ئەو پرسە بكرێتەوە بەوەی كە بەرژه‌وەندیی ئێستای هەرێمی كوردستان لەچیدایە، ئەوە ئەنجام بدرێت. ئەوەشی خستەڕوو كە ئەوان پێیان وانییە ئەو پێشبینیانەی تا ئێستا خراونەتە ڕوو بە شێوەیەك بن بۆ گەیشتن بە چارەسەر دانرابن و هیوای بەردەوامیی گفتوگۆ و دیالۆگی خواست بۆ دۆزینەوەی چارەسەر بۆ ئەو كێشەیە.

FMustafaDutchFMinister250915__2015_09_27_h8m32s2__HO

فه‌رمانگه‌ی پەیوەندیەکانى دەرەوە دادگاى تاوانى نێودەوڵەتى لە لاهاى هانده‌دات له‌ دۆسیه‌ی جینۆسایدی كوردانی ئێزیدی بكۆڵێته‌وه‌

لە چوارچێوەى بەردەوامى هەوڵەکانى حکومەتى هەرێم بۆ بە جینۆساید ناساندنى تاوانەکانى  گروپى تیرۆریستى داعش دژ بە کوردانى ئێزیدى و کارەکانى لێژنەى باڵاى حکومەتى هەرێم بەجینۆساید ناساندنى ئەو تاوانە لە ڕێگاى دادگاى باڵاى تاوانى نێودەوڵەتى، فەلاح مستەفا بەرپرسى پەیوەندیەکانى دەرەوە بە یاوەرى دوو ڕێکخراوى ناحکومى ئێزیدى سەردانى نووسینگەى داواکارى گشتى دادگاى باڵاى تاوانى نێودەوڵەتیان لە لاهاى  کردو ڕاپۆرتێکی تێروتەسەلیان پێشکەش کرد کە تەواوکارى ئەو زانیاریانە بوو کە ساڵى ڕابردوو لەلایەن لێژنەى باڵاوە پێشکەش بە دادگا کرابوو.

ئامانجى پێشکەش کردنى ئەم ڕاپۆرتە بۆ زیاتر هاندانى دادگاى باڵاى تاوانى نێودەوڵەتى بوو بۆ دەست کردن بە لێکۆلینەوەى سەرەتایى لەسەر ئەم تاوانە. سەرەڕاى ئەوەى کە عێراق ئەندام نیە لە پەیمانناى ڕۆماى تایبەت بە دادگاى تاوانى نێودەوڵەتى بەڵام دادگا دەتوانێت لێکۆلێنەوە لەو تاوانە بکات لەسەر بنەماى هاوڵاتى ئەو ووڵاتانەى کە ئەندامن لەم دادگایە و لە ڕێزەکانى داعش ئەم تاوانەیان ئەنجامداوە. بۆیە هیوادراین کە ئەم ڕاپۆرتە کە پوختەیەکى هاوپێچ کراوە زانیارى زیاتر پێشکەش بە دادگا بکات لەسەر ئەم تاوانە قێزەونەى کە ژمارەیەکى زۆر لە چەکدارە بیانیەکان هاوڵاتى ئەو ووڵاتانەن کە ئەندامى ئەم دادگایەن و تاوانەکەیان ئەنجامیان داوە.

بەرپرسى پەیوەندیەکانى دەرەوە ئەوەى خستەڕوو کە حکومەتى هەرێم ئامادەى پێشکەش کردنى هەموو جۆرە ئاسانکارى و پشتگیریەکە بۆ دادگا بۆ هێنانەدى ئەو دادپەروەریە کە کوردانى ئێزیدى و هەرێمى کوردستان داواى دەکەن. ئێزیدیەکان کۆمەڵگایەکى ئاشتیخوازن ئەو تاوانانە بەشێوەیەکى بەرنامە داڕێژراو لەلایەن گروپى تیرۆریستى داعش بەرامبەریان ئەنجامدراوە و کۆمەڵگاى نێودەوڵەتى بەرپرسیارێتى بە جینۆساید ناساندنى ئەم تاوانەى دەکەوێتە ئەستۆ. بەڵگەکانى ئەم تاوانە لەبەردەستن لە ڕووى گۆڕى بە کۆمەڵ و شایەتحاڵ و قوربانیان و دامەزراوە یاساییە نێودەوڵەتیەکان پێویستە بە ئەرکى خۆیان هەڵبستن.

حکومەتى هەرێم داواى دادپەروەرى و ناساندنى ئەو تاوانە و قەرەوبووى قوربانیانى دەکاتەوە و هەوڵدان بۆ ڕێگرى کردن بۆ دڵنیبابوون لە دووبارە نەبوونەوەى ئەم کارەساتە.

كۆبوونه‌وه‌ له‌گه‌ڵ وه‌زیری ده‌ره‌وه‌ی هۆڵه‌ندا

له‌ چوارچێوه‌ی سه‌ردانه‌كه‌ی بۆ هۆڵه‌ندس، دوێنێ بەرپرسى پەیوەندیەکانى دەرەوە بە یاوەرى شاندێک سەردانى وەزارەتى دەرەوەى هۆڵەنداى کرد و لەلایەن بەڕێز بێرت کۆندیرۆس وەزیرى دەرەوەى هۆڵەندا پێشوازیان لێکرا.

بەرپرسى پەیوەندیەکانى دەرەوە سوپاسى بەڕێز بێرت کۆیندێرسى کرد بۆ ئەو پێشوازیە گەرمە و پوختەیەکى لەسەر ڕەوشى ئەمڕۆى هەرێمى کوردستان لە ڕووى سیاسى و سەربازى و ئابورى و پەیوەندیەکانى نێوان هەولێر و بەغدا پێشکەش کرد.

هەروەها ئەوەى خستەڕوو لە پاڵ پتەوکردنى پەیوەندیە دوو قۆڵیەکانى نێوان حکومەتى هەرێمى کوردستان لەگەڵ هۆڵەندا بەشێک لە ئامانجى سەردانەکەیان بۆ سەردانى دادگاى تاوانەکانى نێودەوڵەتى بووە بە مەبەستى بە جینۆساید ناساندنى تاوانەکانى گروپى تیرۆریستى داعش دژ بە کوردانى ئێزیدى و پێکهاتە نەتەوەیى و ئایینەکانى تر. بۆیە داوا لە حکومەتى هۆڵەندا و هەموو ووڵاتانى دۆست دەکەین کە پشتگیرى لەم دۆسیەیە بکەن بۆ ئەوەى تاوانباران دادگایى بکرێن و ئەم تاوانە دڕندانەى کە ئەنجامیان داوە بە جینۆساید بناسرێت.

هەروەها سوپاسى حکومەتى هۆڵەنداى کرد کە لە چوارچێوەى هاوپەیمانێتى نێودەوڵەتى بە سەرۆکایەتى ئەمریکا بە تیمێکى گەورەى سەربازى، مەشق بە هێزەکانى پێشمەرگە دەکەن کە ئەمەش جێگەى پێزانینە.

لە تەوەرێکى تر دیدارەکەدا بەرپرسى پەیوەندیەکانى دەرەوە باسى لە بارودۆخى مرۆیى ئاوارە و پەنابەران کرد کە ژمارەیان نزیکەى ٢ ملیۆن دەبێت و لە هەرێمى کوردستان نیشتەجێن کە  پێویستیان بە هاوکارى مرۆیى زیاتر هەیە و هەرێمى کوردستان دووچارى قەیرانى دارایى بۆتەوە بۆیە گەلى کوردستان و ژێرخانى کوردستان پێویستیان بە هاوکارى و پشتگیرى زیاتر هەیە.

فەلاح مستەفا باسى لە بەردەوامى قەیرانى سوریا و کاریگەریەکانى لەسەر ووڵاتانى ناوچەکە و مەترسیەکانى گروپە تیرۆریستیەکان کرد.

لە بەرامبەردا بەڕێز بێرت کۆندیرۆس وەزیرى دەرەوەى هۆڵەندا پابەندى ووڵاتەکەى دووپاتکردەوە بۆ پتەوکردنى پەیوەندیەکان لە ڕووى سیاسى و ئابورى و وەبەرهێنان و یارمەتى مرۆیى. حکومەتى هۆڵەندا هاوشێوەى ساڵى ڕابڕدوو بڕیاریداوە بەردەوام دەبێت لە هاوکارى بۆ ئاوارەکانى ناوخۆو پەنابەرانى سوریا.

هەروەها لە چوارچێوەى هاوپەیمانى نێودەوڵەتى بەردەوام دەبن لە شەڕ دژى گروپى تیرۆریستى داعش  لە ڕێگاى هێرشى ئاسمانى و خولى مەشق و ڕاهێنان بۆ هێزەکانى پێشمەرگە.
سەبارەت بە تاوانەکانى گروپى تیرۆریستى داعش بەرامبەر بە کوردانى ئێزیدى وەزیرى دەرەوەى هۆڵەندا گووتى کە پشتگیرى لە هەوڵەکانى هەرێمى کوردستان دەکەن و پێویستە ئەو کەسانەى کە ئەم کارەیان کردووە دادگایى بکرێن.

لە کۆتایى هەردوولا جەختیان کردەوە لەسەر پەرەپێدانى پەیوەندیەکانى لە بوارى ئابورى و بازرگانى و کەلتورى  بەتایبەتى لە ڕێگاى بەشدارى کردن لە پێشانگا نێودەوڵەتیەکان و کۆڕبەندى ئابورى.

جێگەى ئاماژەیە کە لە دیدارەکەدا ژەنەڕاڵ ڤان دێر لان بەڕێوبەرى ئۆپەراسیۆنەکان لە وەزارەتى بەرگرى  و خاتوو بیرگیتا تازیلار بەرپرسى ڕۆژهەڵاتى ناوەڕاست و باکورى ئەفریقیا لە وەزارەتى دەرەوە و عمر رشید بەڕێوەبەرى گشتى و توفیق رحمن بەڕێوەبەرى پێشکەوتوو لە فەرمانگەى پەیوەندیەکانى دەرەوە ئامادەى دیدارەکە بوون.