بەیانیی ئەمڕۆ پێنجشەممە 19/11/2015 بە ئامادەبوونی بەڕێز نێچیرڤان بارزانی سەرۆك وەزیرانی هەرێمی كوردستان، بەڕێزان فۆمیۆ ئیوا باڵیۆزی ژاپۆن لە عێراق و شاندێكی یاوەری و ژمارەیەك لە وەزیران و پەرلەمانتاران و بەرپرسانی ئیداری سنووری پارێزگای دهۆك، لە ڕێوڕەسمێكدا بەردی بناغەی پرۆژەی هایدرۆپاوەری 36 میگاواتی لە ناحیەی دێرەلوكى سەر بە قەزای ئامێدی دانرا كە لەلایەن ئاژانسی هاریكارییە نێودەوڵەتییەكانی ژاپۆن (جایكا)وە ئەنجام دەدرێت و لە چوارچێوەی ئەو قەرزانەی كە ژاپۆن پێشكەش بە عێراقی دەكات، پارەدار دەكرێت.
لە ڕێوڕەسمەكەدا دوای پێشكەشكردنی چەند وتەیەك لەلایەن بەڕێزان قایمەقامی قەزای ئامێدی و وەزیری كارەبای حكوومەتی هەرێمی كوردستان و باڵیۆزی ژاپۆن لە عێراق و نوێنەری كۆمپانیایەكی ڕاوێژكاری ئیتاڵی، بەڕێز سەرۆك وەزیران وتەیەكی پێشكەشكرد و تیایدا جگە لە بەخێرهێنانی بەڕێز باڵیۆزی ژاپۆن لە عێراق و سوپاسكردنی ئاژانسی جایكای ژاپۆنی بۆ بەئەنجام گەیاندن و پارەداركردنی پڕۆژەكە كە ساڵی ڕابردووش بە بەهای 120 ملیۆن دۆلار هاوكاریی ئاوارە و پەنابەرانی دەستی تیرۆری كردووە، جەختی لەوە كردەوە كە لە بارودۆخی ئێستای كوردستان ئەم قەرزە هاوكارییەكی گەورەیە و جێگەی ڕێز و پێزانینی خەڵك و حكوومەتی هەرێمی كوردستانە. هەروەك سوپاسی هەریەك لە وەزارەتەكانی پلاندانان و كارەبایشی كرد بۆ ماندووبوونیان تا ئەو پڕۆژەیەیان گەیاندە ئەم قۆناغە.
دەربارەی گرنگیی پڕۆژەكەش بۆ دەڤەرەكە ئاماژەی بەوە دا كە جیا لەوەی وزەیەكی خاوێن بۆ ژمارەیەكی زۆری خەڵكی ناوچەكە دابین دەكات، لە هەمان كاتدا ڕێژەیەكی زۆری ئاوی دەڤەرەكە لە بەفیڕۆچوون دەپارێزێت و لە پڕۆژەكانی كشتوكاڵ و ئاودێری بەكاردەهێنرێت و ڕۆڵێكی گەورەی لەم بوارەدا دەبێت. هەروەها ئەنجامدانی پڕۆژەكەی وەك وەفاداریی حكوومەتی هەرێمی كوردستانی بۆ خەبات و تێكۆشانی خەڵكی خەباتگێڕ و تێكۆشەری دەڤەرەكە قبووڵ كرد كە سەر و ماڵ و ژیانی خۆیان بۆ ئازادی و سەركەوتنی كوردستان كردۆتە قوربانی و ئەمڕۆش بەرامبەر تیرۆرستانی داعش مەردانە و بە خوێنی خۆیان بەرگری لە كوردستان دەكەن و چەندین شەهیدیان بۆ پاراستنی كوردستان داوە بۆیە شایەنی هەموو شتێكن كە بۆیان بكرێت.
لە بەشێكی دیكەی قسەكانیدا بەڕێزیان تیشكی خستە سەر ئەو قەیرانانەی كە ڕووبەڕووی هەرێمی كوردستان بوونەتەوە وەك شەڕی داعش و قەیرانی دارایی و بڕینی بودجەی هەرێم لەلایەن بەغداوە و دابەزینی بەهای نەوتی خاو لە بازاڕەكانی جیهاندا و ئاماژەی بەوە دا كە جێبەجێكردنی پڕۆژەیەكی وەها لەناو ئەو هەموو قەیرانانەدا، حەز و ئارەزووی گەلی كوردستان بۆ ژیان و پێشكەوتن و ئاوەدانكردنەوە لە ڕۆژە سەختەكاندا پیشان دەدات هەروەك ئەوەش دەسەلمێنێت كە هیچ هێزێكی تاریكی هەرچەند دڕندە بێت، ناتوانێت ئیرادەی گەلی كوردستان بۆ پێشكەوتن و ئاوەدانكردنەوە و جوانكردنی ژیان بوەستێنن.
دەربارەی شكستەكانی تیرۆرستانی داعشیش لە بەرامبەر هێزی پێشمەرگە، بەڕێز سەرۆك وەزیران تیشكی خستە سەر ڕزگاركردنی شاری شەنگال لە دەستی تیرۆرستان كە بە سەرپەرشتی ڕاستەوخۆی بەڕێز مەسعود بارزانی سەرۆكی هەرێمی كوردستان و پشتیوانی هێزی ئاسمانی هاوپەیمانان بە تایبەتی ئەمەریكا ئۆپەراسیۆنەكە ئەنجامدرا و بەهۆیەوە گورزێكی سەربازی و لۆجیستیكی جەرگبڕ لە تیرۆرستانی داعش درا و گەورەترین پردی پەیوەندی و پشتگیری داعشی لە نێوان سوریا و عێراق بڕی و سەركەوتێكی گەورەش بوو بۆ هەرێمی كوردستان كە دەبێتە هۆی گۆڕینی نەخشەی سیاسی و سەربازیی ناوچەكە و لەسەر ئاستی جیهانیش دەنگدانەوەیەكی یەكجار زۆری هەبوو.
جەختی لەوەش كردەوە كە ئێستا شەنگال پێویستی بە ئاوەدانكردنەوەیە و ئەمەش كارێكی نەتەوەیی و نیشتمانیی حكوومەتی هەرێمی كوردستانە و لە هەمان كاتدا كارێكی ئاسان نییە. بۆ ئەم مەبەستە حكوومەتی هەرێمی كوردستان پلانێكی هەمەلایەنە بۆ ئاوەدانكردنەوەی شەنگال ئامادە دەكات و هەموو هەوڵێكی خۆی دەخاتە گەڕ بۆئەوەی ئەم شارە لە جاران باشتر ئاوەدان بكرێتەوە، بەڵام لە بارودۆخی ئێستادا بۆ ئەنجامدانی ئەم ئەركە گەورەیە، ئەوان پێویستیان بە هاوكاریی نێودەوڵەتی و وڵاتە كۆمەكبەخشەكان بە شێوەیەكی گشتی و بە تایبەتی حكوومەتی عێراق هەیە و بە پێویستییشی زانی حكوومەتی عێراق لەم ڕووەوە ئەركی خۆی جێبەجێ بكات و داوای لە هەموو لایەنە ناوخۆ و نێودەوڵەتییەكان كرد هاوكاریی حكوومەتی هەرێمی كوردستان بكەن لە ئاوەدانكردنەوەی شەنگالدا و داوای لە حكوومەتی ژاپۆنیش كرد لەم ڕووەوە هاوكاریی حكوومەتی هەرێم و خەڵكی شەنگال بكات. هەروەك داوای لە پەرلەمانی عێراقیش كرد لە بارەی قەرزی نوێی ژاپۆن بۆ عێراق، ڕەزامەندی لەسەر بەشی هەرێمی كوردستان لەو قەرزە بدات. ئەوەشی بیرهێنایەوە كە بەر لە داگیركردنی شەنگال لەلایەن تیرۆرستانی داعشەوە، حكوومەتی هەرێمی كوردستان بە سەدان ملیۆن دۆلاری بۆ پرۆژە خزمەتگوزارییەكانی ئەو دەڤەرە تەرخان كردووە و كەرتی تایبەتیشی هانداوە پرۆژە لە دەڤەری شەنگال ئەنجام بدەن.
هیوای ئەوەشی خواست وەك شەنگال هەموو دەڤەرەكانی دیكەی هەرێمی كوردستان و عێراق لە نزیكترین كاتدا لە دەستی تیرۆرستانی داعش ڕزگار بكرێن و خەڵكی ئەو دەڤەرانە كە ئێزدی و مەسیحی و شەبەك و توركمان و عەرەبن، بگەڕێنەوە سەر ماڵ و حاڵی خۆیان و دەست بە ژیانێكی نوێ بكەنەوە و لەمبارەیەشەوە ئەوەی لە توانای حكوومەتی هەرێمی كوردستاندا بێت هاوكار خەڵكی دەڤەرەكە دەكات.
لە كۆتایی وتەكەیدا هیوای خواست بەمەبەستی ئەنجامدان و دانانی بەردی بناغەی پڕۆژەی زیاتر لە دەڤەرەكە، بە دیداری خەڵكی ناوچەكە شادبێتەوە و سەری ڕێز و نەوازشی بۆ گیانی پاكی شەهیدانی كوردستان دانەواند كە بە سایەی خەبات و خوێنی ئەوان كوردستان ئازاد دەكرێت و لە قۆناغی داهاتووشدا ئاوەدان دەكرێتەوە و هاوخەمی و هاوسۆزی خۆی بۆ كەسوكاری شەهیدان پیشان دا و هیوای چاكبوونەوەشی بۆ پێشمەرگە بریندارەكان خواست. هەروەها هاوسۆزی و هاوخەمی خەڵك و حكوومەتی هەرێمی كوردستانی بۆ كەسوكاری هەردوو قوربانیانی ژاپۆنی (كینجی گۆتۆ ، هاروونا یۆكاوا) دەربڕی كە سەرتای ساڵ لەلایەن تیرۆرستانی داعشەوە بە شێوەیەكی زۆر دڕندانە شەهید كران.
هەروەها سوپاسی كۆمپانیای ڕاوێژكاریی ئیتاڵی و كۆمپانیاكانی زۆزك و فرابی ئێرانی و هاوبەشە ئیماراتییەكانی كرد بۆ بە ئەنجام گەیاندنی ئەم پڕۆژەیە و هیوای خواست هەروەك كارە سەركەوتووەكانی پێشوویان، ئەم پڕۆژەیەش بە شێوەیەكی سەركەوتوو بە ئەنجام بگەیەنن.
ئەمە دەقی وتاری بەڕێز نێچیرڤان بارزانی سەرۆك وەزیرانی هەرێمی كوردستانە:
ئامادەبوو یێت بەڕێز، مێهڤانێت قەدر گران،
ڕۆژا وە خۆش، هوین هه‌مى لایەك بخێربێن سەر سەر و سەر چاڤا..
ده‌سپێكا ڤێ ڕێوڕه‌سمێ، من دڤێت ب خۆشحالیڤه بخێرهاتنه‌كا تایبه‌تا ڕێزدار فۆمیۆ ئیوا باڵیۆزێ ژاپۆنێ ل عیراقێ و مێهڤانێن دگه‌لدا بكه‌م، كو ئه‌ڤڕۆ ب تایبه‌تى بۆ به‌شداریا ڕێوڕه‌سما دانانا به‌رێ بنیاتى بۆ پرۆژێ هایدرۆپاوه‌رێ 36 مێگاواتى ل دێره‌لۆكێ یێ دگه‌ل مه‌دا بەشدارن، بخێر بێن سەر چاڤا.
هه‌روه‌سا من دڤێت سپاسیا ژاپۆنێ و ب تایبه‌تیش ئاژانسا هاریكارى یێن ناڤنه‌ته‌وه‌یى یێن ژاپۆنێ ـ جایكا ـ بكه‌م كو بۆ ئه‌نجامدانا ڤێ پرۆژێ، د چارچۆڤا وان قه‌رزادا یێن كو داینه عیراقێ،هاریكاریا حكوومه‌تا هه‌رێما كوردستانێش یا كرى و پاره‌یێ پێویست بۆ ئه‌نجامدانا ڤێ پرۆژێ ب قه‌رز هاتیە دانان. دو سالێن چووییش ب بهایێ نێزیكى 120 ملیۆن دۆلاران ب ڕێكا ئاژانسێن یوو ئێن، هاریكاریا ئاواره و په‌نابه‌را ژلایێ جیاكا ڤە هاتیە كرن ئەم سوپاسیا وان دكەین.
د ڤێ ڕه‌وشا نۆكه یا هه‌رێما كوردستانێدا، ئه‌ڤ قه‌رزه، هاریكارییه‌كا مه‌زنه و جهێ ڕێز و پێزانینا حكوومه‌ت و خه‌ڵكێ كوردستانێ یه. هه‌روه‌سا من دڤێت سپاسیا وه‌زاره‌تا پلاندانانێ و وه‌زاره‌تا كاره‌بایێ یا حكوومەتا هەرێما كوردستانێ بكەم، كو لسه‌ر ڤێ پرۆژێ گه‌له‌ك ماندى بوون هه‌تا گه‌هاندینه قۆناغا ئه‌ڤرۆ و دانانا به‌رێ بنیاتى.
ئه‌ڤ پرۆژه، كو ب پترى 165 ملیۆن دۆلارا دێ هێته ئه‌نجامدان، دێ خزمه‌ته‌كا مه‌زنا خه‌لكێ ڤێ ده‌ڤه‌رێ كه‌ت. ژلایه‌كیڤه دێ ئه‌نه‌رژییه‌كا پاقژا به‌دیل و كاره‌بایێ بۆ هه‌ژماره‌كا مه‌زنا خه‌لكێ ده‌ڤه‌رێ دابین كه‌ت، ژ لایه‌كێ دیڤه‌ش ڕێژه‌یه‌كا مه‌زنا ئاڤا ڤێ ده‌ڤه‌رێ، چ ئاڤا چه‌م و كانى و ڕویبارا بیت، یانیش ئاڤا به‌فر و باران و له‌هیا بیت، دێ پارێزێت و دێ بۆ گه‌له‌ك پرۆژێن ئاڤدان و ئاڤدێریێ، مفایه‌كێ به‌رچاڤ ل ڤێ پڕۆژێ هێتە وەرگرتن و دێ ڕۆله‌كێ گرنگ بۆ ڤه‌ژاندنا كه‌رتێ چاندن و كشتوكالێ ل ده‌ڤه‌رێ گێڕیت.
ئه‌ڤ پرۆژه، دگه‌ل هندێ كو هه‌وجه‌دارییه‌كا پێویست یا ده‌ڤه‌رێ یه، هه‌روه‌سا وه‌فاداریا حكوومه‌تا هه‌رێما كوردستانێ یه، بۆ خه‌بات و تێكۆشین و ماندیبوینا خه‌لكێ خه‌باتگێڕ و تێكۆشه‌رێ ڤێ ده‌ڤه‌رێ، كو ب درێژیا هه‌مى شۆڕه‌شێن كوردستانێ، به‌رده‌وام پێشمه‌رگه بووینه و سه‌ر و مال و ژیانا خۆ، بۆ ئازادى و سه‌ركه‌فتنا كوردستانێ، كرینه قوربانى.
ئه‌ڤڕۆش مێرخاس و عه‌گیدێت ڤێ ده‌ڤه‌رێ، گه‌له‌ك مه‌ردانه به‌رامبه‌رى تیرۆرستا ڕاوه‌ستیانه و، یێ به‌ڕه‌ڤانیێ ل كوردستانێ دكه‌ن و ب خوینا خۆ یێ ده‌ستكه‌فتى یێن هه‌رێما كوردستانێ دپارێزن. لبه‌ر هندێ، خه‌لكێ ڤێ ده‌ڤه‌رێ، هێژایى گه‌له‌ك و گه‌له‌ك خزمه‌ت و پرۆژێن هۆسا و یێن مه‌زنتریشه. ئه‌م هیڤیدارین كو پاشه‌ڕۆژه‌كا نه‌یا دویر، دێ گه‌له‌ك پرۆژێن دى ل ڤێ ده‌ڤه‌رێ و گه‌له‌ك ده‌ڤه‌رێن دى یێن كوردستانێ ئه‌نجام ده‌ین.
ئاماده‌بوویێن هێژا..
دانانا به‌رێ بنیاتى بۆ پرۆژه‌یه‌كێ هۆسا یێ مه‌زن، دڤێ ڕه‌وشا ئالۆزا كوردستانێدا، كو ژ لایه‌كیڤه شه‌ڕه‌كێ دژوار ل سه‌ر كوردستانێ هاتیه سه‌پاندن، ژ لایه‌كێ دیڤه‌ش نێزیكى ملیۆنەك و حەفتسەد هزار ئاواره و په‌نابه‌را به‌رێ خۆ دایه كوردستانێ، دگه‌ل وێ قه‌یرانا دارایى یا كو ل ئه‌نجامێ بڕینا بودجا كوردستانێ ژ لایێ حكوومه‌تا عیراقێڤه و كێمبوونا بهایێ نه‌فتێ چێ بووى، د ڕه‌وشه‌كا هۆسادا، ئه‌نجامدانا ڤێ پرۆژێ، په‌یامه‌كا گرنگه و نیشانا وێ هندێ یه كوردستان و گه‌لێ كوردستانێ، د ڕۆژ و ڕه‌وشێن هه‌ره ته‌نگ و تاریشدا، ڤیان و حه‌زكرن و ئیرادا خۆ بۆ ژیانێ و، بۆ پێشڤه‌برنا ژیانێ و ئاڤاكرنا وه‌لاتێ خۆ، لده‌ست ناده‌ت.
ئه‌نجامدانا كار و پرۆژا و، خه‌بات و تێكۆشین و قه‌هره‌مانى یا پێشمه‌رگه و كوڕ و كچێن وه‌لاتێ مه، نیشان و په‌یامه‌كا ڕۆن و ئاشكرایه كو چ هێزێن تاریێ، چ ڕێكخستنێن تیرۆرێ و چ دوژمنێن مرۆڤاتیێ، هه‌رچه‌ند هۆڤ و دڕه‌نده بن، نه‌شێن ئیرادا ملله‌تێ مه بشكێنن. نه‌شێن كاروانێ كوردستانێ بۆ به‌ره‌ڤ پێشڤه‌چوونێ، ئاڤاكرنێ و جوانكرنا ژیانێ، ڕاوه‌ستینن، كورد و كوردستان دێ بەردەوام بیت.
خه‌لكێ كوردستانێ، ملله‌ته‌كێ زندییه، ملله‌ته‌كێ خودان ئیراده و مرۆڤدۆست و ژیاندۆسته، عاشقێ ئاڤاكرن و ئاڤه‌دانیێ یه، لبه‌ر هندێ، دگه‌ل هه‌مى زه‌حمه‌تى و ئاسته‌نگیاش، ئه‌م دێ هه‌ر له‌سه‌ر ئاڤاكرن، بنیاتنانێ و ئاڤه‌دانكردنێ به‌رده‌وام بین. به‌رێ مه به‌رده‌وام هه‌ر دێ ل ئاڤاكرنا وه‌لاتى و خزمه‌تكرنا خه‌لكێ كوردستانێ بیت.
مێهڤانێت هێژا:
هوین هه‌مى دزانن كو هه‌فتیا چوویى، ب مێرخاسیا پێشمه‌رگه‌یێن قه‌هره‌مان و ب سه‌رپه‌رشتیا ڕاسته‌وخۆ یا جه‌نابێ سه‌رۆك بارزانى و ب پشتگیریا هێزێن هه‌ڤپه‌یمانا و ب تایبه‌تیش هێزێن ئه‌سمانى یێن ئه‌مه‌ریكا، شنگال و ده‌وروبه‌رێن وێ، ژ ده‌ستێ تاوانكار و تیرۆرستێن داعشێ هاتنه ئازادكرن. ڕزگاركرنا شنگالێ ده‌ربه‌كا مه‌زنا له‌شكه‌رى و لۆجستیك بوو ب تیرۆرستێن داعشێ كه‌فت. ڤێ سه‌ركه‌فتنێ مه‌زنترین ڕێك و هێلا داعشێ یا په‌یوه‌ندى و پشته‌ڤانیێ لناڤبه‌را سووریێ و عیراقێ ب تەمامەتی بڕى.
هه‌روه‌سا سه‌ركه‌فتنه‌كا مه‌زن بوو بۆ هه‌رێما كوردستانێ كو دێ ب شێوه‌یه‌كێ به‌رچاڤو بۆ خزمه‌تا كوردستانێ گه‌له‌ك نه‌خشه و هه‌ڤكێشه‌یێن سه‌ربازى و سیاسیش ل ده‌ڤه‌رێ گۆڕێت. داستانه‌كا دى یا مه‌زن یا پێشمه‌رگا بوو، كو ئه‌ڤرۆ بوویه جهێ ڕێز و سه‌ربلندیێ و سیمبۆله‌كا مه‌زنا كوردستانێ ل سه‌رانسه‌رى جیهانێ.
ڕزگاركرنا شنگالێ دویماهى نینه. شنگال یا برینداره و دڤێت ئه‌م برینێن وێ ده‌رمان بكه‌ین. ئاڤه‌دانكرنا شنگالێ، كار و ئه‌ركه‌كێ مه‌زنێ نه‌ته‌وه‌یى و نیشتمانییه و تشته‌كێ ب ساناهیش نییه. حكوومه‌تا هه‌رێما كوردستانێ ده‌ست پێكریه و دێ پلانه‌كا هه‌مه‌لایه‌ن بۆ ئاڤه‌دانكرنا شنگالێ ئاماده كه‌ت. دێ هه‌مى هه‌ولێن خۆ ده‌ت كو ئه‌ڤ باژێڕه ژبه‌رێ باشتر بێته ئاڤه‌دانكرن، لێ بێگومان دڤێ ڕه‌وشا نۆكه‌دا بۆ ڤى ئه‌ركێ مه‌زن، ئه‌م هه‌وجه‌دارى هاریكاریا ناڤنه‌ته‌وه‌یى و وه‌لاتێن كۆمه‌كبه‌خش بگشتى و، هه‌روه‌سا حكوومه‌تا عیراقێینه.
هه‌روه‌سا ئه‌م هیڤیدارین ژاپۆن وه‌ك وه‌لاته‌كێ كۆمه‌كبه‌خش كو پشتى سالا 2003ێ ڕۆڵه‌كێ به‌رچاڤ بۆ ئاڤه‌دانكرنا عیراقێ گێڕایه، بۆ ئاڤه‌دانكرنا شنگالێش هاریكاریێ بكه‌ت. هه‌ر لێره داخازێ ل په‌رله‌مانێ عیراقێ دكه‌م، كو د بابه‌تێ قه‌رزێ نوى یێ ژاپۆنێدا بۆ عیراقێ، ڕه‌زامه‌ندیێ له‌سه‌ر به‌شێ هه‌رێما كوردستانێ ل ڤى قه‌رزى بده‌ت.
بۆ ڤێ چه‌ندێ داخازێ ژ جڤاكا ناڤنه‌ته‌وه‌یى و حكوومه‌تا عیراقێ دكه‌ین كو بۆ ئاڤه‌دانكرنا شنگالێ، هاریكاریا پێویست بۆ هەرێما كوردستانی و خه‌لكێ شنگالێ و ده‌ڤه‌رێ بكه‌ن. تڤیا حكوومه‌تا عیراقێ ئه‌ركێ خۆ بجى بینیت و بۆ ئاڤه‌دانكردنا شنگالێ و خه‌لكێ شنگالێ هاریكاریێ بكه‌ت.
حكوومه‌تا هه‌رێما كوردستانێ، به‌رى داگیركرنا شنگالێش، ب بهایێ سه‌دان ملیۆن دۆلاران، كار و پرۆژه د گه‌له‌ك وارێن جدایێن ژێرخان و خزمه‌تگوزارى یێن گشتى و په‌روه‌ردێدا ل شنگالێ ئه‌نجام داینه، هاریكاریا شنگالێ كریه و كه‌رتێ تایبه‌تیش هان دایه كو ل وێرێ پرۆژا ئه‌نجام بده‌ت.
هیڤیدارین كو وه‌كى شنگالێ، ب زویترین ده‌م هه‌مى ده‌ڤه‌رێن دى یێن هه‌رێما كوردستانێ و عیراقێش ب گشتى ژ ده‌ستێ ڕه‌شێ داعشێ بێنه ئازادكرن، داكو خه‌لكێ وا ده‌ڤه‌راش، هه‌ڤوه‌لاتى یێن مه یێن ئێزدى، مه‌سیحى، شه‌به‌ك، توركمان و عه‌ره‌ب ڤه‌گه‌ڕێنه‌ڤ سه‌ر جى و مال و حالێن خۆ و ژیانه‌كا نوى ده‌ست پێبكه‌نه‌ڤه. ئێش و كۆڤانێن چوویى، هێدى هێدى دگه‌ل ئاڤه‌دانكردنێ و چاندنا هیڤى و ئومێدا بۆ ژیانه‌كا نوى، سڤك ببن. بۆ ڤێ چه‌ندێش حكوومه‌تا هه‌رێما كوردستانێ دێ هه‌مى هه‌ولێن خۆ ده‌ت و چ ژ ده‌ستێ مه بێت، خه‌مساریێ ناكه‌ین.
ل دویماهیێ، جاره‌كا دى بخێرهاتنه‌كا گه‌رما هه‌وه هه‌میا و ب تایبه‌تى مێهڤانێ مه ڕێزدار باڵیۆزێ ژاپۆنێ ل عیراقێ دكه‌م. سپاسى و ده‌ستخۆشیێ ل وه‌زیر و وه‌زاره‌تێن په‌یوه‌ندیدار و هه‌مى وا كۆمپانیا دكه‌م ئه‌وێن كو دێ ڤێ پرۆژێ ئه‌نجام ده‌ن. هیڤیا سه‌ركه‌فتنێ و كاره‌كێ سه‌ركه‌فتى بۆ وان دخازم. هیڤیدارم كو ئه‌م گه‌له‌ك جارێن دى بۆ دانانا به‌رێ بنیاتى و ئه‌نجامدانا گه‌له‌ك ڕێوڕه‌سمێن دى یێن وه‌كى ڤێ ڕێوڕه‌سمێ، دگه‌ل هه‌وه شاد ببینه‌ڤه.
سوپاسییەكا تایبەتی ژی ژبۆ كۆمپانیا ئیتاڵی كو كارێ ڕاوێژكاری بۆ ڤێ پڕۆژێ ئەنجام دای و سوپاسیا كۆمپانیا زۆزك دكەم و هیڤیدارم ب باشترین شێوە ڤی پڕۆژی جی بجی بكەن و سوپاسیا كۆمپانیا فاراب یا ئیرانی و هەڤبەشێن وێ یێت ئیماراتی دكەم و هیڤیدارم ئەڤ پڕۆژەیە ب شكلەكێ باش و ڕێكوپێك بهێتە جی بجی كرن. بێ شك ڕابردوویا كۆمپانیا فاراب وێ یەكێ نیشان ددەت كو بەری نۆكە كارێن گەلەك باش و ڕێكوپێك ئەنجام داینە و هیڤیداران ڤێ پڕۆژێ ژی ب شكلەكێ سەركەتی ئەنجام بدەت.
سلاڤ و ڕێز، دروود و نه‌مرى بۆ گیانێ پاقژێ شه‌هیدێن كوردستانێ، كو ب سایا خوین و خه‌باتا وان، ئه‌ڤرۆ بوهست بوهست و گاڤ ب گاڤ كوردستان یا تێته ئازادكرن و سبه‌یش دێ هێته ئاڤه‌دانكرن. ئه‌م سه‌رێ خۆ لبه‌ر مه‌زنى و پیرۆزییا گیانێ وان دچه‌مینین. هه‌ر ب ڤێ هه‌لكه‌فتنێ، ئه‌م هه‌ردو قوربانى یێن ژاپۆنى “كینجى گۆتۆ و هاروونا یۆكاوا” ببیر تینین، كو ده‌سپێكا سالێ ب شێوه‌كێ هۆڤانه ژئالیێ داعشێڤه هاتنه شه‌هیدكرن، ئه‌مهه‌ڤسۆزێن مالباتێن وانین.
هه‌مى لایه‌ك جارەكا دی بخێربێن سەرچاڤا و پیرۆزە ل وە و ئەم چاڤەڕێی پڕۆژێت مەسترین ژبۆ دەڤەرا وە، چونكی دەڤەرا وە شایستەیا پڕۆژە و كارێن زێدەترە.
بخێربێن سەرچاڤا و زۆر سپاس.
