_88Y9064

دانیشتن لەگەڵ کۆمیتەی مافی مرۆڤ، یەکسانی و بەشداریی گشتی پەرلەمانی هەرێمی باسک

ڕێکەوتی 22/10/2014 دابان شەدەڵە، نوێنەری حکومەتی هەرێمی کوردستان لە ئیسپانیا، لە دانیشتنێکی تایبەتی کۆمیتەی مافی مرۆڤ، یەکسانی و بەشداریی گشتی پەرلەمانی هەرێمی باسک، سەبارەت بە بارودۆخی کوردستان بە گشتی و بە تایبەت ڕەوشی مرۆیی، هەستا بە پێشکەشکردنی روونکردنەوەی وێنەیی و دەنگی تایبەت بەم بابەتە بۆ پەرلەمانتاران، هەروەها وەڵامدانەوەی پرسیاری پەرلەمانتارانی ئەو کۆمیتەیە لەسەر بابەتەکە.

پاش ئەوەی لە هەفتەی ڕابردوودا، بە هەماهەنگی لەگەڵ پارتە سیاسیەکان و پەرلەمانی هەرێمی باسک دا، پەرلەمانی هەرێمەکە بە کۆی دەنگ بەیاننامەیەکی فەرمیان لەسەر دۆزی کورد  ڕاگەیاند، کە لە یەکێک لە خاڵەکاندا، پەرلەمانی هەرێمەکە داوای بە ئەرێنی وەڵامدانەوەی بابەتی هاوکاریی هەرێمی کورستان دەکات، لە لایەن حکومەتی هەرێمی باسک ەوە.

لە ژێر هەڕەشەی هێرشی دڕندانەی ڕێکخراوی توندڕەویی داعشدا کە میلەتی کوردیان لە هەرێمی کوردستان و ڕۆژئاوا کردووەتە ئامانج، ئەمڕۆ لە ڕوماڵێکی تایبەت بۆ بەدواداچوونی ڕەوشی گشتی و بەتایبەت مرۆیی، نوێنەری حکومەتی هەرێم هەستا بە ڕوونکردنەوەی بارودۆخەکە بە ووردی، سەبارەت بە چۆنیەتی گەشەسەندن و بەرفراوانبوونی ڕێکخراویی توندڕەوی داعش، کە ئەم ڕێکخراوە بوون بە مەترسیەکی گەورە بۆ سەر پێکەوەژیان هەڕەشەی ڕاستەوخۆی لە ناوبردنی کەمە نەتەوایەتیەکان، وەک کریستیان و کوردانی یەزیدی، وە دواتر کە چۆن نمونەی کوردستانیان کردووەتە ئامانج. چۆنیەتی مامەڵەکردنی حکومەتی هەرێم لەگەڵ ئەو ژمارە زۆرە لە ئاوارەکان باسکرا، کە سەرەڕای قورسایی باری شەڕ و بودجە، ئەوپەڕی هەوڵ دراوە تاوەکو  ڕەوشی مرۆییان چارەسەر بکرێت. بەڵام ئەمە بابەتێکە کە هێندە ئاسان نیەو، نازانرێت چەند دەخایەنێت، بۆیە ئەرکی کۆمەڵگای نێودەوڵەتیە کە بە دەنگی ئەم بابەتەوە بچێت.

وەڵامی ئەم کۆمیسێۆنە، کە پێنج گروپی پەرلەمانی لە خۆدەگرێت: EA-NV (ناسێۆنالیستەکانی هەرێمی باسک)، EH Bildu، SV-ES(سۆسیالیستەکانی باسک) ، PP-ETP(گروپی پۆپیولاری باسک) ، وە Mixto-UpyD، وە حکومەتی هەرێمی باسک ئەرێنی دەبێت بۆ هاوکاریکردنی گەلی کوردستان و لە هەنگاوی داهاتوودا شێوازی ڕێکخستنی هاوکاریەکان دەخرێتە ژێر باس و جێبەجێکردنەوە.

پەرلەمانتارانی ئەم کۆمیتەیە بە ووردی چاودێری بارودۆخی کوردستانیان کردووە لە ڕابردووداو، هەندێکیان سەردانیان ئەنجامداوە ، سەرەڕای دەربڕینی هاوسۆزیی بۆ نمونەی پێکەوەژیان و سوپاسکردنی هێزی پێشمەرگەو بەرگری گەلی کوردستان بەبێ جیاوازی لەو ناوچە پڕ کێشەیەدا، ئەگەری هاوکاریی بۆ ڕۆژئاواش بە جیا لە چوارچێوەی ڕێگا نێودەوڵەتیەکانەوە، بە ئەرکێکی خۆیانی دەزانن کە پێشکەش بە گەلی کوردستانی بکەن.

nb_pm_spain__2014_10_16_h18m30s44__MZ

نێچیرڤان بارزانى پێشوازى له‌ باڵیۆزى ئیسپانیا له‌ عیراق ده‌كات


ئێواره‌ى ئه‌مڕۆ پێنجشه‌ممه‌ 16ى ئۆكتۆبه‌رى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان پێشوازى له‌ به‌ڕێز خۆسێ مارییا فێررێ باڵیۆزى ئیسپانیا له‌ عیراق كرد كه‌ جارى یه‌كه‌ سه‌ردانى هه‌رێمى كوردستان ده‌كات.

له‌ دیدارێكدا ڕه‌وشى ئێستاى عیراق و بارودۆخى ئه‌منى له‌ به‌غدا و ناوچه‌كانى دیكه‌ى وڵات و مه‌ترسییه‌كانى تیرۆرستانى داعش له‌سه‌ر ناوچه‌كه‌ به‌ گشتى تاوتوێ كرا و، به‌ڕێز باڵیۆزى ئیسپانى نیگه‌رانیى خۆى له‌ پێشهات و نائارامییه‌كان ده‌ربڕى، هه‌روه‌ها تیشكى خسته‌ سه‌ر ئه‌وه‌ى كه‌ وێڕاى خراپیى ڕه‌وشى ئه‌منى و نائارامى له‌ زۆر شوێنى عیراق، كه‌چى ئه‌م چه‌ند ڕۆژانه‌ى دوایى كه‌ له‌ هه‌ولێر بووه‌، بارودۆخێكى ته‌واو جیاواز و ئارامى و ئاسایش و سه‌قامگیرى بینیوه‌، بۆ ئه‌مه‌ش ده‌ستخۆشى له‌ حكوومه‌تى هه‌رێمى كوردستان كرد.

له‌ به‌شێكى دیكه‌ى دیداره‌كه‌دا دروستبوونى هاوپه‌یمانیى نێوده‌وڵه‌تى له‌ دژى تیرۆر و ڕۆڵى ئیسپانیا له‌و هاوپه‌یمانییه‌دا باس كرا و، تیشك خرایه‌ سه‌ر گرنگیى به‌ره‌نگاربوونه‌وه‌ى داعش له‌ لایه‌ن پێشمه‌رگه‌ى كوردستانه‌وه‌. له‌مباره‌یه‌وه‌ به‌ڕێز باڵیۆزى ئیسپانى ڕوونى كرده‌وه‌ كه‌ په‌رله‌مانى وڵاته‌كه‌ى دانیشتنێكى تایبه‌ت له‌سه‌ر ئه‌م پرسه‌ ساز ده‌كات و پشتگریى ئیسپانیاى بۆ هه‌رێمى كوردستان و عیراق له‌ جه‌نگى دژى تیرۆردا دووپات كرده‌وه‌.

له‌ دیداره‌كه‌دا هه‌ردوولا داكۆكییان له‌ خواستى دوولایه‌نه‌ بۆ به‌ره‌وپێشبردنى په‌یوه‌ندییه‌ سیاسى و ئابوورییه‌كان كرده‌وه‌ و به‌ڕێز نێچیرڤان بارزانى ئاماژه‌ى به‌وه‌ دا كه‌ هه‌رێمى كوردستان به‌ گرنگییه‌وه‌ له‌ په‌یوه‌ندییه‌كانى له‌گه‌ل ئیسپانیا ده‌ڕوانێت، هه‌روه‌ها هیواى خواست ئیسپانیا ڕۆڵى خۆى له‌ جه‌نگى دژى تیرۆردا بگێڕێت و له‌ پرسى ئاواره‌ و په‌نابه‌رانیشدا هاوكاریى هه‌رێمى كوردستان بكات. به‌ڕێز باڵیۆزى ئیسپانیش جه‌ختى له‌وه‌ كرده‌وه‌ كه‌ په‌ره‌ به‌ په‌یوه‌ندییه‌ بازرگانى و سیاسییه‌كانیان له‌گه‌ڵ هه‌رێمى كوردستان ده‌ده‌ن و كۆمپانیا و سه‌رمایه‌دارانى ئیسپانیا هان ده‌ده‌ن بۆ ئه‌وه‌ى ڕوو بكه‌نه‌ هه‌رێمى كوردستان و كارى تیادا بكه‌ن.

پرسى به‌شداریكردنى هه‌رێمى كوردستان له‌ حكوومه‌تى تازه‌ى عیراقدا و گرنگیى ئه‌و به‌شداریكردنه‌ بۆ پرۆسه‌ى سیاسى و ئێستا و داهاتووى عیراق، به‌شێكى دیكه‌ى گفتوگۆى هه‌ردوولا بوو.

daban-univers

هەلی خوێندن بۆ چوار زانکۆی هەرێمی کوردستان لە چوارچێوەی پرۆژەی ئێراسمۆس موندۆس-مەرحەبا- بە هەماهەنگی نوێنەرایەتی هەرێمی کوردستان لە ئیسپانیا

ڕۆژی دووشەممە،13/10/2014،لە چوارچێوەی کاری هەماهەنگیکردنی نوێنەرایەتی حکومەتی هەرێمی کوردستان لە ئیسپانیا بۆ دروستکردنی پردی پەیوەندی زانستی لە نێوان زانکۆکانی هەرێمی کوردستان و ووڵاتی ئیسپانیا، ئەمڕۆ بە ئامادەبوونی نوێنەری حکومەتی هەرێمی کوردستان لە ئیسپانیا، دابان شەدەڵە، هەروەها نوێنەرانی زانکۆکانی سلێمانی، هەڵەبجە، کۆیەو ڕاپەڕین، لە زانکۆی سانتیاگۆ دی کۆمپۆستێلا لە هەرێمی گالیسیای ئیسپانیا بەفەرمی دەستپێکی هەنگاوی یەکەمی پرۆژەی ئێراسمۆس موندۆس – مەرحەبا –  ڕاگەیاندرا.

پاش ئەوەی لە ڕابردوودا زانکۆکانی کوردستان میوانداری کراون و بە هاوکاری نوێنەرایەتی پردی پەیوەندی لەگەڵ زانکۆی سانتیاگۆ دی کۆمپۆستێلا و چەندین زانکۆی تر لە ووڵاتی ئیسپانیا دروستبوو، هەلی ئەوە ڕەخسا کە چەند زانکۆیەک لە کوردستانەوە بەشداربن لەم پرۆژەیەداو، پاش پێشکەشکردنی پرۆژەکانیان، لەسەر ئاستی عێراق تەنها چوار زانکۆی هەرێمی کوردستان هەلی قبوڵکردنیان لە پرۆگرامەکەدا پێبەخشرا.

لە چوارچێوەی ئەم پرۆگرامەدا بە کۆی ٤١ شوێن، هەلی خوێندن بۆ خوێندکارانی هەرێمی کوردستان لەو چوار زانکۆیە دەڕەخسێت – لەسەر ئاستەکانی بەکالۆرێۆس، ماستەر، دوکتۆرا و پۆست-دوکتۆرا، سەرەڕای بەرنامەی ئاڵوگۆڕی کادیری ئەکادیمی لە نێوان ئەو زانکۆیانەی کە لە چوارچێوەی پرۆگرامەکەدا بەشدارن. ئەوەی شایانی باسە کە ئەم پرۆگرامە لەلایەن یەکێتی ئەوروپاوە پارەی بۆ دابینکراوە بە بڕی 2.340.050 یۆرۆ. کۆی پرۆگرامەکە 17 زانکۆ لە خۆدەگرێت لە ووڵاتانی تری  وەک ئیسپانیا، بەریتانیا، ئەڵمانیا، ئێران، پۆرتوگال، ئیتالیا، فەڕەنسا، بولگاریا و پۆڵەندا ، کە ئەمەش پردێکی پەیوەندی زانستی بەرفراوان دروستدەکات.

پرۆژەکە تاوەکو 14 ی تەمموزری 2018 بەردەوام دەبێت، کە تیایدا پێشکەشکاری سەرکەوتوو، وە هەڵبژێردراو لە لایەن زانکۆکەی خۆیەوە، لە ژێر پرۆگرامەکەدا بۆ ماوەی دیاریکراوی خوێندنەکە بەپێ ی ڕێنماییەکان، بڕە پارەی پێدەبەخشرێت کە: دەرماڵەی سەفەر، تێچوونی ڤیزە، دەرماڵەی ژیان، تێچوونی بەشداریکردن و تەئمین لە خۆدەگرێت.

ئەو زانکۆیانەی کە سەرکەوتووانە لە کوردستانەوە توانیان بە هەنگاوەکانی قبوڵکردن لە پرۆگرامەکەدا بڕۆن، زانکۆکانی سلێمانی، ڕاپەڕین، هەڵەبجە و زانکۆیە کۆیە بوون. هەنگاوەکانی بەشداریکردن لەم پرۆژەیەدا هەر لەسەرەتاوە، بە ئێستاشەوە لەلایەن نوێنەرایەتی حکومەتی هەرێمی کوردستان لە ئیسپانیا پشتگیری لێکراوە. لە کۆی ئەو 41 کورسیەی کە بۆ ئەو 4 زانکۆیەی کوردستان تەرخانکراوە: 15 کورسی بۆ خوێندنی بەکالۆرێۆسە، 7 کورسی بۆ ماستەر، 8 کورسی بۆ دوکتۆرا، 2 کورسی بۆ پۆست دوکتۆرا و، 9 کورسی بۆ ئەکادیمیانی ئەو زانکۆیانەیە.

لە مەراسیمی کردنەوەی پرۆژەکەدا،جێگری ڕاگری زانکۆی سانتیاگۆ دی کۆمپۆستێلا-بەرپرسیار لە بە نێودەوڵەتیکردنی زانکۆکە، پرۆفیسۆر کارلۆس سالگادۆ بەخێرهاتنی هەمووانی کرد، دەستخۆشی لە زانکۆ سەرکەوتووەکان کرد وە هیوای بەختێکی باشی بۆ خواستن.

دابان شەدەڵە، سوپاسی ڕۆڵی زانکۆی سانتیاگۆ دی کۆمپۆستێلای کرد لەم پرۆژەیەداو کورتەیەکی باسکرد لەسەر بارودۆخی خوێندنی زانکۆ لە هەرێمی کوردستان “کە چۆن لە سایەی ڕژێمەکانی پێشوو، بە تایبەت سەدام، زانکۆکانی کوردستان تووشی داخستن هاتبوون، وە بەلاوەنرابوون، کە ئەمەش کاریگەری نێگەتیڤی هەبووە لەسەر ئاستی پێگەیشتنی ئەکادیمی لە کوردستان، بەڵام لە دوای 2003 ەوە دەرگای دووبارە گەشەسەندنەوەی ئەم بوارە خەریکە واڵا دەبێتەوە”.

کارۆلینا گاربالیاوسکاتی، بەرپرسیاری ئۆفیسی پرۆژەکە لە یەکێتی ئەوروپا، سوپاسی هەموو ئەوانەی کرد کە بوونەتە هۆی سەرکەوتنی پرۆژەکە تا ئەم ئاستە، هەروەها سوپاسی زانکۆی سانتیاگۆ دی کۆمپۆستێلای کرد بۆ بەڕێوەبردنی پرۆژەکە.

نوێنەرانی زانکۆکانی کوردستان هەریەکە هەستان بە پێشکەشکردنی کورتەیەک لەسەر زانکۆکانیان بۆ ئامادەبووان. لە ڕۆژانی تری داهاتووی ئەم هەنگاوەدا ۆرکشۆپی تایبەت لەسەر ووردەکاری پرۆژەکەوە، چۆنیەتی هەڵبژاردن، بەڕێوەبردن، کواڵیتی هەڵبژاردنەکان پێشکەشکران.

بەشداری سەرکەوتووانەی ئەو 4 زانکۆیەی هەرێمی کوردستان ئاماژەیەکی باشە بۆ گەشەسەندنەوەی ئاستی خوێندنی زانکۆ لە هەرێمی کوردستان، وە هێمایە بۆ سەرکەوتوانە بەشداریکردن لە پرۆژەیەکی لەم شێوەیەدا.

130576949752083028

سه‌رۆكی هه‌رێمی كوردستان پێشوازی له‌ وه‌زیری ده‌ره‌وه‌ی به‌ریتانیا ده‌كات

ئێوارەی ئه‌مڕۆ دووشه‌ممه‌ 13/10/2014 له‌ سه‌لاحه‌دین به‌ڕێز مسعود بارزانی سه‌رۆكی هه‌رێمی كوردستان پێشوازی له‌ فلیپ هامۆند وه‌زیری ده‌ره‌وه‌ی به‌ریتانیا و شاندێكی یاوه‌ری كرد كه پێكهاتبوو‌ له‌ ئێدوارد ئۆكدێن به‌رپرسی كاروباری رۆژهه‌ڵاتی ناوەڕاست و ئەفریقیای وەزارەتی دەرەوەی بریتانیا و جەنەڕاڵ سێر سیمۆن نێرده‌ی ئاساییشی بریتانیا بۆ هەرێمی كوردستان و فرانك باكێر بالیۆزی به‌ریتانیا له‌ به‌غدا و ژماره‌یه‌ك راوێژكاری سیاسی و سه‌ربازی جكوومەتی بریتانیا.

له‌ دیدارێكدا، كه‌ هه‌ریه‌ك له‌ مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان و مسته‌فا سه‌ید قادر وه‌زیری پێشمه‌رگه‌ی حكوومه‌تی هه‌رێمی كوردستان و شێخ جه‌عفه‌ر شێخ مستەفا و فەریق شێروان و جه‌بار یاوه‌ر ئەندامانی فەرماندەیی گشتیی هێزەكانی پاراستنی هەرێمی كوردستان ئاماده‌ی بوون، سه‌ره‌تا سه‌رۆك بارزانی به‌ گه‌رمی به‌خێرهاتنی شاندی میوانی كرد و سوپاسی حكوومەتی بریتانیا و هێزه‌كانی هاوپه‌یمانانی كرد بۆ ئەو هاوكاری و پشتیوانییەی پێشكەشی‌ هێزه‌كانی پێشمه‌رگه‌ی كوردستانیان كردووە.

دواتر سەرۆك بارزانی وێڕای ئاماژەدان بە‌ سه‌ركه‌وتنه‌كانی پێشمه‌رگه‌ لە بەرەكانی شەڕ ئەوەی خستەڕوو كە كوردستان ڕووبەڕووی شەڕێكی درێژخایەن لەگەڵ دوژمنێكی سەرسەخت و تاوانبار بووەتەوە كە هەڕەشەیە بۆسەر هەموو لایەك. سەرۆك بارزانی لە درێژەی قسەكانیدا باسی ئەوەی كرد كە هه‌رچه‌نده‌ پێشمه‌رگه‌ له‌ڕووی پڕچه‌ككردنه‌وه‌ ئابلووقه‌ی خرابووه‌ سه‌ر، به‌ڵام قاره‌مانانه‌ ڕووبەڕووی ڕێكخراوێكی تیرۆریستی بوویەوە كە ئیمكانیاتی دەوڵەتێكی لەبەردەستدایە و توانی زوو تاكتیكی تیرۆریستان بزانێ و ڕێ لە پێشڕەوییان بگرێ و له‌ چه‌ندین ناوچه‌دا پاشه‌كشه‌یان پێ بكات و شكستیان بدات.

هەر لەم دیدارەدا وەزیری دەرەوەی بریتانیا هێمای بە پەیوەندییەكانی نێوان وڵاتەكەی و هەرێمی كوردستان دا و ئەوەی خستەڕوو كە قورسایی ئەم شەڕە سەخت لەسەر شانی كوردستانە و كوردستان هەموو جیهان شەڕی داعش دەكات و پیرۆزباییشی لە سەرۆك بارزانی و هێزەكانی پێشمەرگە كرد بۆ ئەو سەركەوتنانەی لەدژی داعش بەدەست هاتووە. وەزیری دەرەوەی بریتانیا ئاماژەی بەوەدا كە ئێستا هێزەكانی پێشمەرگە و هاوپەیمانان بۆ ڕووبەڕووبوونەوەی داعش بەرچاوڕوونییەكی زیاتریان هەیە.

هه‌ر له‌ دیداره‌كه‌دا گفتوگۆ له‌سه‌ر چۆنییەتیی له‌ناوبردنی تیرۆریستانی داعش كرا و جەخت لەوە كرایەوە كه‌ لەناوبردتی تیرۆریستان هەوڵێكی هه‌مه‌لایه‌نه‌ی سەربازی و سیاسی و ئابووری ده‌وێ و پێویسته‌ سه‌رچاوه‌ داراییه‌كانی وشك بكرێت و ئازادی هاتوچۆیان لێ قه‌ده‌غه‌ بكرێت و پێویست ده‌كات له‌رووی فكریشه‌وه‌ زانایانی ئایینی و رۆشنبیران و ناوەندە هزرییەكان بەڕووی تیرۆریستاندا بێنەوە چونكە ئەم هەڕەشەیە هەڕەشەیەكی جدییە و هەموو لایەك دەخاتە ژێر مەترسی.

له‌ به‌شێكی دیكه‌ی دیداره‌كه‌دا هەماهەنگیی زیاتری‌ نێوان هێزی پێشمه‌رگه‌ و هێزەكانی هاوپه‌یمانان تاوتوێ كرا بۆ ئەوەی ئامانجە سەربازییەكانی تیرۆریستان بە شێوەیەكی كاریگەر لەناوببردرێن و ژیانی خەڵكی سڤیلیش بە باشترین شێوە بپارێزرێت.

هه‌ر له‌و دیداره‌دا باس له‌ پرۆسه‌ی سیاسی له‌ عێراق و پێكهێنانی حكوومه‌تی نوێ كرا، له‌وباره‌وه‌ سه‌رۆكی هه‌رێمی كوردستان ئەوەی خستەڕوو كه‌ سه‌ركردایه‌تیی لایەنە سیاسییەكانی كوردستان بڕیاری داوه‌ به‌شداری پڕۆسەی سیاسیی عێراق بێت و پشتیوانی له‌ سه‌رۆك وه‌زیرانی نوێی عێراق بكات.
له‌ ته‌وه‌رێكی دیكه‌ی كۆبونه‌وه‌كه‌دا گفتوگۆ له‌سه‌ر دووباره‌ رێكخستنه‌وه‌ی سوپای عێراق كرا، كه‌ پێویسته‌ هاوسه‌نگی تێدا بێت و ڕۆڵ و به‌شی پێشمه‌رگه‌ له‌به‌رچاو بگیردرێت.

قسەكردن لەبارەی ڕۆڵی وڵاتانی ناوچه‌كه‌ له‌ به‌هێزتركردنی هاوپه‌یمانیی نێودەوڵەتی لە دژ به‌ تیرۆریستانی داعش ته‌وه‌رێكی دیكه‌ی دیداره‌كه‌ بوو.