ministry-of-natural-resources-2

حکومەتی هەرێمی کوردستان داوا لە وەزیری نەوتی عێراق دەکات وازبهێنێت لە دەستێوەردان لە کاری هەناردەکردنی نەوتی حکومەتی هەرێمی کوردستان

پاش ئەوەی دادگای باڵای فیدراڵی عێراق بڕیاری دا لەسەر ڕەتکردنەوەی  داواکاری وەزارەتی نەوتی  فیدراڵ کە بەمەبەستی ڕاگرتنی هەناردەکردنی نەوتی حکومەتی هەرێمی کوردستان پێشکەشیان کردبوو، هەرچەندە کە بەپێ ی دەستورە، حکومەتی هەرێمی کوردستان نامەیەکی نوسراوی ئاڕاستەی وەزیری نەوتی فیدراڵ کردووە کە داوای لێدەکات گوێڕایەڵی بڕیاری دادگای باڵا بێت و وازبهێنێت لە دەستێوەردان لە کاری هەناردەکردنی نەوتی حکومەتی هەرێمی کوردستان.

See the original letter in Arabic and the translation in English

10553872565_6c1da2c82a_z

یونیسكۆ قەڵای هەولێر وەكو شوێنەوارێكى جیهانى ناساند – ڤیدیۆ

لیژنەی شوێنەواری جیهانیی رێكخراوی یونیسكۆ، قەڵای هەولێری خستە لیستی شوێنەوارەکانی جیهان دوای دەربڕینی رەزامەندی لەلایەن زۆرینەی ئەندامانی لیژنەكە لە کۆبوونەوەکەی رۆژی 21ی یۆنیۆ/حوزەیران كە لە دۆحە سازکرا.

دارا یەعقوبی، سەرۆكی کۆمیسیۆنی باڵای بوژاندنەوەی قەڵای هەولێر لەلێدوانێكیدا بۆ سایتی فەرمی حكومەتی هەرێمی كوردستان لە دۆحەوە رایگەیاند کە دوای چەندین كۆبوونەوە لەگەڵ ئەندامانی لیژنەكە وپێدانی روونكردنەوەی پێویست لەبارەی بارودۆخی قەڵا ومێژوو ومەترسیەكانی سەر ئەم شوێنەوارە ئەگەر لایەنی نێودەوڵەتی فریای نەكەوت، لەدوایین كۆبوونەوەی لیژنەكە 18 ئەندام ونوێنەری وڵاتان لەكۆی 21 ئەندام تیایدا رەزامەندی لەسەر ئەو مەسەلەیە درا.

یەعقوبی روونیكردەوە کە “پێشكەشكردنی ئەم داوایە دەبوا لەلایەن یەكێك لەوڵاتانی ئەندامی لیژنەكە بێت، ئەم ئەركەش وڵاتی جەزائیر پێی هەستا وپاڵپشتیەكی تەواوی بۆ مەسەلەكە نیشاندا ورۆڵێكی بەرچاویشی لەمبارەیەوە بینی”. هەروەها ووتی کە نوێنەرایەتی عیراق لە یونیسکۆ بەپەرۆشەوە بوو بۆ ئەم مەسەلەیە.

هاوكات دووپاتیشیكردەوە ئەگەرچی رێكخراوی ئیكۆمۆس پێشنیاری سلبى لەبارەی قەڵاوە پێشكەشكردبوو، بەڵام کۆمیسیۆنی بوژانەوەی قەڵا ئامادەیە بەهەر شێوەیەك بێت مامەڵەیان لەگەڵ بكات وهاوكات سوپاسی هەموو لایەنێكیشی لەمبارەیەوە كرد.

ئاماژەی بەوەشدا كە جگە لە جەزائیر توركیاش رۆڵێكی باشی لەمبارەیەوە گێڕا وشانبەشانی جەزائیر، پاڵپشتی تەواویان بۆ گفتوگۆكردن لەبارەی ئەم دۆسێیە دووپاتكردەوە بەوەی لەو کۆبوونەوەیەدا وبەبێ دواخستن ئەم كارە جێبەجێبكرێت.

قەڵای هەولێر، یەكێكە لەكۆنترین شاكارەكانی جیهان، كە بەپێی قسەی مێژوونووسان، تەمەنی بۆ زیاتر لە حەوت هەزار ساڵ دەگەڕێتەوە، قەڵا كۆنترین شوێنی نیشتەجێبوونی مرۆڤایەتیە کە ژیان تیایدا هەر بەردەوام بووبێت و لەسەر زەویەكی بازنەیی رووتەختە دروستكراوە، كە رووبەری 102 هەزار و 190 مەتری دووجایەو کەوتووەتە ناوەڕاستی شاری هەولێرو 415 مەتر لەئاستی رووی دەریا بەرزەو 26 مەتر و 25 سانتیمەتر لە ئاستی رووی شاری هەولێر بەزرترە، كە لە بەرزترین شوێنی، دەگاتە نزیكەی 30مەتر.

مێژووی ئەم شاكارە دێرینەش، لە دەورووبەری ساڵی 2000 پ.ز لە نووسراوەكانی پادشای سۆمەری شۆلكی بە ناوی ئوربیلیم هاتووە.

هەروەها لە چاخی ئەكەدی 2350 – 2150 پ.ز و لەسەردەمی یەكەم پاشایان، سەرجۆنی ئەكەدی، لە هەڵمەتەكەی بەرەو باكوور بۆ لێدانی گوتییەكان و فراوانكردنی ئیپمراتۆریەتەكەی، بە هەولێردا رۆیشتووەو باس لە هەولێر كراوە.

Kerry_Erbil_2014__2014_06_24_h19m51s1__DS

سەرۆكی هەرێمی كوردستان پێشوازی لە وەزیری دەرەوەی ئەمەریكا دەكات

ئەمڕۆ سێشەممە 24ـی حوزەیرانى 2014 لە هەولێری پایتەخت بەڕێز مەسعود بارزانی سەرۆكی هەرێمی كوردستان پێشوازی لە جۆن كێری وەزیری دەرەوەی ویلایەتە یەكگرتووەكانی ئەمەریكا و شاندێكی یاوەری كرد كە لە جێگری یاریدەدەری وەزیری دەرەوە بۆ كاروباری عێراق و باڵیۆزی ئەمەریكا لە عێراق و چەند بەرپرسێكی وەزارەتی دەرەوەی ویلایەتە یەكگرتووەكانی ئەمەریكا پێكهاتبوون.

لە دیدارێكدا كە نەوشیروان مستەفا ڕێكخەری گشتیی بزووتنەوەی گۆڕان و نێچیرڤان بارزانی سەرۆكی حكوومەتی هەرێمی كوردستان و بەرهەم ساڵح ئەندامی مەكتەبی سیاسیی یەكێتیی نیشتیمانیی كوردستان و قوباد تاڵەبانی جێگری سەرۆكی حكوومەتی هەرێم و فواد حوسێن سەرۆكی دیوانی سەرۆكایەتیی هەرێم و فەلاح مستەفا بەرپرسی فەرمانگەی پەیوەندییەكانی هەرێمی كوردستان ئامادەی بوون سەرەتا وەزیری دەرەوەی ئەمەریكا خۆشحاڵیی خۆی بە هاتنی بۆ كوردستان نیشاندا و ئاماژەی بەوەدا كە ئەو كار و بنیاتنانەی لە هەرێمی كوردستان كراوە و هەروەها سیاسەت و ئیدارەدانی كاروبارەكان لە كوردستان زۆر باش بووە و ئەوەیشی باس كرد كە ئیدارەی سەرۆك ئۆباما دیتێكی ئیجابیی هەیە بەرانبەر ئەو بنیاتنانەی لە هەرێمی كوردستاندا هەیە و هەروەها بەبۆنەی پێكهێنانی كابینەی هەشتەمی حكوومەت پیرۆزبایی لە سەرۆكی هەرێمی كوردستان كرد.

سەبارەت بە بارودۆخی سیاسیی عێراق وەزیری دەرەوەی ئەمەریكا ئەوەی خستەڕوو كە وڵاتەكەی بە وردی بەدواداچوون بۆ بارودۆخی عێراق دەكات و نیگەرانییەكی زۆری بەرانبەر بارودۆخەكە و بەهێزبوونی تیرۆریستان هەیە و بە پێویستیشی زانی كە عێراق بە زووترین كات لەم قەیرانە دەرچێت. وەزیری دەرەوەی ئەمەریكا ئامادەیی وڵاتەكەیشی نیشاندا كە یارمەتیی پڕۆسەی سیاسی و پێكهێنانی حكوومەتێكی بنكەفراوان و گشتگیر بدات كە هەموو پێكهاتەكانی عێراق تێیدا بەشدار بن.

لە بەرامبەردا سەرۆك بارزانی بەناوی خۆی و سەركردایەتیی سیاسیی كوردستان زۆر بە گەرمی بەخێرهاتنی وەزیری دەرەوەی ئەمەریكای كرد و سوپاس و پێزانینی خۆی و گەلی كوردستانیشی بۆ حكوومەت و گەلی ئەمەریكا ڕاگەیاند بۆ ئەو قوربانی و یارمەتی و پشتگیرییەی هەر لە ڕاپەڕینەوە هەتا ڕووخانی ڕژێم و دواتر پێشكەشی كوردستانیان كردووە و ئەوەیشی خستەڕوو كە جێگەی شانازییە ئێمە توانیومانە ئەزموونێكی سەركەوتوو پێشانی جیهان و ئەمەریكا بدەین.

سەرۆك بارزانی لە درێژەی قسەكانیدا بەوردی باسی لە پڕۆسەی سیاسیی عێراق لە دە ساڵی ڕابردوو و ئاستەنگ و قەیرانەكانی كرد و هێمای بەوەدا كە هاوپەیمانەكانمان لە جێبەجێكردنی دەستوور و پابەندبوون بە ڕێككەوتنەكان بەرەو پاشەوە دەچوون لەگەڵئەوەیشدا نەرمییەكی زۆرمان نواند و هەردەم ئامادە بووین بۆ چارەسەری كێشەكان بەڵام بەداخەوە كێشەكان قووڵتر بوون و نەمانتوانی سەربكەوین.

سەرۆك بارزانی ئەوەیشی بەڕوونی باس كرد كە ئێستا قەناعەتێكمان لا دروست بووە كە بەغدا نیازی وایە وەك سەردەمانی پێشوو كوردستان بە ژێردەستەیی و پاشكۆیی ببینێت، گەلی كوردستانیش كە قوربانییەكی گەورەی بۆ ئازادی داوە ئەمە قبووڵ ناكات.

گەلی كوردستان دژی تیرۆرە بەهەموو شێوەكانی و قوربانیشی لە ئەو دژایەتیكردنە داوە بەڵام ئێستاكە شەڕی تیرۆر بووەتە پەردەیەك بۆ ئەوەی تەسفیە و ململانێی تاییفی پەرە بستێنێت و ئێمەش نابینە بەشێك لە ململانێی تاییفی. سەبارەت بە مافی گەلی كوردستان لە دەستووری عێراقدا سەرۆك بارزانی ئاماژەی بەوەدا كە لەگەڵ عێراقدا لەسەر دەستوور ڕێككەوتین ئەو دەستوورەی عێراق به دوو نەتەوەی سەرەكی كورد و عەرەب پێناسە دەكات و زۆر بە ڕوونی لە دیباچەی دەستووردا هاتووە كە پابەندبوون بە دەستوور مەرجە بۆ مانەوەی عێراق بە یەكپارچەیی.

لەبارەی چارەسەری گرفت و قەیرانە تازەكانیش سەرۆك بارزانی هێمای بەوەدا كە هەر چارەسەرێك بهێتە ئارا پێویستە لەژێر ڕۆشنایی گۆڕانكاری و واقعی سیاسی و ئەمنیی تازەی عێراقدا بێت و جەوهەری كێشەكانیش سیاسیین نەك سەربازی و دەبێ مامەڵە لەگەڵ هۆكارەكان بكرێت نەك ئەنجامەكان. ئەگەر بێتوو ڕێگەی سیاسی گونجاو دۆزرایەوە ئەو كات باشتر دەتوانرێ شەڕ لەگەڵ تیرۆریش بكرێت. پەیوەست بە ڕووداوەكانی ئەم دواییەش سەرۆك بارزانی ئەوەی بە وەزیری دەرەوەی ئەمەریكا ڕاگەیاند كە بەر لە قەیرانەكە بەغدامان لە مەترسیی دۆخەكە ئاگادار كردەوە بەڵام بە جدییان وەرنەگرت.

لەدرێژەی قسەكانیدا سەرۆك بارزانی ئەوەی خستەڕوو كە دوای دە ساڵ چاوەڕوانی ئەو پرسیارە هەیە كە چۆن هەنگاو بنێین؟ ئەگەر دەرفەت مابێت پێویستە شیعە و سووننە لەسەر بنەمای نوێ و بەلەبەرچاوگرتنی واقعی تازە كار بكەن و ئەو كات ڕووبەڕووبووونەوەی تیرۆریش ئاسانتر دەبێت. لەبارەی هێزی پێشمەرگەیش سەرۆك بارزانی هێمای بەوەدا كە هێزەكانی پێشمەرگە بەرپرسیارێتیی پاراستنی ئاساییشی كوردستانیان لەسەر شانە و قوربانیشیان داوە و هەڕەشەی تیرۆریستانیش بەردەوام و جدییە و پێشمەرگە ئامادەی بەرپەرچدانەوەی ئەم هەڕەشانەن.

دواتر جۆن كێری وەزیری دەرەوەی ئەمەریكا سوپاسی سەرۆك بارزانی كرد بۆ ئەم ڕوونكردنەوە چڕوپڕە و باسی ئەوەی كرد كە گومان لەوەدا نییە هەرێمی كوردستان دەتوانێ لەڕووی ئابووری و بوارەكانی دی گەشە بكات. لەبارەی كێشەكانی عێراقیش وەزیری دەرەوەی ئەمەریكا وێڕای باسكردنی نیگەرانییەكان جەختی لەوە كردەوە كە پێویستە گۆڕانكاری هەبێت و كۆمەڵێك بڕیاری گرنگ وەربگیرێت و داوای كرد سەرۆك بارزانی لەو پڕۆسەیەدا بەشدار بێت و ڕۆڵی خۆی بگێڕێت و حكوومەتێكی تازە پێكبێت و ئەگەر هاتوو پڕۆسەی سیاسیی عێراق بەرەو پێشەوە بچێت ئەوە ئەمەریكا ئامادەیە پشتیوانیی عێراق بكات لە شەڕی تیرۆر.

باسكردنی ئەولەویەتدان بە چارەسەری سیاسی بەر لە چارەسەری سەربازی بۆ قەیرانی عێراق تەوەرێكی دیكەی ئەم كۆبوونەوەیە بوو.

k8_meeting_nb_pm__2014_06_22_h16m24s0__MZ

يەكەمين كۆبوونەوەي كابينەي هەشتەمي حكومەت

پێشنیوه‌ڕۆى ئه‌مڕۆ یه‌كشه‌ممه‌ 22ى حوزه‌یرانى 2014، كابینه‌ى هه‌شته‌مى حكوومه‌تى هه‌رێمى كوردستان به‌ سه‌رۆكایه‌تیى نێچیرڤان بارزانى سه‌رۆك وه‌زیرانى هه‌رێمى كوردستان یه‌كه‌مین كۆبوونه‌وه‌ى خۆى ساز دا.

له‌ سه‌ره‌تاى كۆبوونه‌وه‌كه‌دا نێچیرڤان بارزانى به‌خێرهاتن وپیرۆزبایى له‌ وه‌ز‌یران كرد و هیواى سه‌ركه‌وتنى بۆ خواستن، هه‌روه‌ها تیشكى خسته‌ سه‌ر ئه‌وه‌ى كه‌ ڕاسته‌ پێكهێنانى كابینه‌كه‌ ماوه‌یه‌كى زۆرى خایاند، به‌ڵام له‌ كۆتاییدا سه‌ركه‌وتن له‌وه‌ى توانیان پێكه‌وه‌ حكوومه‌تێكى كۆده‌نگیى نیشتمانیى پێكهاتوو له‌ هه‌موو لایه‌نه‌ براوه‌كان پێك بهێنین، كه‌ ئه‌مه‌ش بۆ قۆناغى ئه‌مڕۆ پێویستییه‌كى هه‌ره‌ له‌پێشى هه‌رێمى كوردستانه‌ و پێشهاته‌كانیش ڕاستیى ئه‌و بۆچوون و تێڕوانینه‌ى ده‌رخست كه‌ پێویسته‌ له‌ قۆناغه‌كانى داهاتوودا لایه‌نه‌كانى هه‌رێمى كوردستان یه‌كده‌نگ و یه‌كڕیز و ته‌با بن و پێكه‌وه‌ ڕووبه‌ڕووى ئه‌و ته‌حه‌دیاتانه‌ى دێنه‌ پێش، ببنه‌وه.

نێچیرڤان بارزانى هه‌روه‌ها دووپاتىكرده‌وه‌ له‌ هه‌رێمى كوردستان سه‌ره‌تاى قۆناغێكى تازه‌ى حوكمڕانى ده‌ست پێده‌كات كه‌ تیایدا هه‌موو پێكهێنه‌رانى حكوومه‌ت هاوبه‌شى ڕاسته‌قینه‌ى ده‌سه‌ڵات و بڕیاردان ده‌بن، بۆیه‌ هێچ شتێك تاكلایه‌نه‌ ئه‌نجام نادرێت و ده‌بێ هه‌مووان پێكه‌وه‌ وه‌ك یه‌ك تیم كار بكه‌ن و هه‌ماهه‌نگ و هاوكار بن تا له‌ ڕاپه‌ڕاندن و جێبه‌جێكردنى كار و ئه‌ركه‌كاندا سه‌ربكه‌ون.

سه‌رۆك وه‌زیران هه‌روه‌ها جه‌ختى له‌وه‌ كرده‌وه‌ كه‌ له‌ ماوه‌ى چوار ساڵى داهاتوودا حكوومه‌تى هه‌رێمى كوردستان به‌ شێوه‌یه‌كى سه‌ره‌كى كار له‌سه‌ر به‌دامه‌زراوه‌كردنى داموده‌زگاكانى حكوومه‌ت ده‌كات، چونكه‌ بۆ هه‌بوونى حكوومه‌تێكى كاراى شه‌فاف، به‌دامه‌زراوه‌كردنى حكوومه‌ت له‌ هه‌موو شتێك پێویستتره‌. هه‌روه‌ها گوتى: “دڵنیام ده‌توانین باڵه‌خانه‌ و پڕۆژه‌ى زۆر گه‌وره‌ ئه‌نجام بده‌ین، به‌ڵام ئه‌گه‌ر بنه‌مایه‌كى پته‌وى حوكمڕانى دانه‌مه‌زرێنین، سه‌رناكه‌وین”.

نێچیرڤان بارزانى دانى به‌وه‌شدا نا كه‌ وێڕاى ئه‌وه‌ى له‌ ماوه‌ى ڕابردوودا كارى زۆر باش كراوه‌، به‌ڵام تیمى حكوومه‌ت وه‌ك پێویست سه‌ركه‌وتوو نه‌بوو له‌وه‌ى وه‌ك تیم پێكه‌وه كار بكه‌ن‌، بۆیه‌ ده‌بێ له‌مه‌و دوا وه‌ك تیمێك كار بكه‌ن و هه‌موو وه‌زیر و وه‌زاره‌ته‌كان له‌گه‌ڵ یه‌كترى ئه‌وپه‌ڕى هه‌ماهه‌نگ و هاوكار بن و به‌ ماناى وشه‌ یه‌ك تیم بن. داوایشى له‌ وه‌زیره‌كان كرد “وه‌زاره‌ته‌كان بكه‌نه‌ دامه‌زراوه‌ى ڕێكوپێك و هه‌وڵ بده‌ن بنه‌مایه‌كى كارگێڕیى ڕێكوپێك دابنێن، چونكه‌ بێ بنه‌ماى كارگێڕیى پته‌و، ناتوانن شتى گه‌وره‌ بكه‌ین”.

سه‌رۆك وه‌زیران هه‌روه‌ها ئاماژه‌ى به‌وه‌ دا كه‌ نادادپه‌روه‌رى له‌ مووچه‌دا هه‌یه و‌ سیاسه‌تى ڕازیكردنى خه‌ڵك كه‌ پێشتر په‌یره‌و كراوه‌؛ كاریگه‌ریى زۆر خراپى له‌سه‌ر پرسى مووچه‌ دروست كردووه‌، هه‌روه‌ها زۆرێك له‌ یاساكان پێویستییان به‌ هه‌مواركردنه‌وه‌ هه‌یه‌ و په‌یكه‌رى كارگێڕیى وه‌زاره‌ته‌كانیش ده‌بێ چاك بكرێته‌وه. هه‌روه‌ها تیشكى خسته سه‌ر ڕۆڵى چاودێرییانه‌ى په‌رله‌مانى كوردستان و داواى له‌ وه‌زیران كرد كه‌ ئه‌وپه‌ڕى هاوكارى و هه‌ماهه‌نگى له‌گه‌ڵ په‌رله‌مان و لیژنه‌كانیدا بكه‌ن و ئه‌م پرسه‌ زۆر به‌ جددى وه‌ربگرن.

نێچیرڤان بارزانى داواى كرد ماوه‌ى سه‌ره‌تاى كارى حكوومه‌ت بۆ ئه‌وه‌ بێت له‌ یاساكان، په‌یكه‌رى كارگێڕى و چۆنیه‌تیى پێكه‌وه‌ كاركردن بكۆڵرێته‌وه‌ تا هه‌نگاوى ڕاست بنێن و هه‌مووانى دڵنیا كرده‌وه‌ كه‌ به‌ هیچ شێوه‌یه‌ك له‌ سه‌رۆكایه‌تیى ئه‌نجومه‌نى وه‌زیران حزبایه‌تى ناكرێت و هه‌مووان وه‌ك تیم پێكه‌وه‌ كار ده‌كه‌ن بۆ سه‌رخستنى به‌رنامه‌ى حكوومه‌ت، هه‌موو پشتگرییه‌كى سه‌رۆكایه‌تیى ئه‌نجومه‌نى وه‌زیرانیشى بۆ وه‌زاره‌ته‌كان له‌پێناو هەر چاكسازییه‌ك و سه‌ركه‌وتنى كاره‌كانیاندا؛ دووپات كرده‌وه‌. هه‌روه‌ها جه‌ختى له‌وه‌ كرده‌وه‌ كه‌ ئه‌وله‌وییه‌تى حكوومه‌تى هه‌رێمى كوردستان له‌ ڕووى دابینكردنى ئاسایش و كاره‌با و هه‌موو خزمه‌تگوزارییه‌كانه‌وه‌؛ هه‌رێمى كوردستانه‌.

دواتر به‌رنامه‌ى كارى كۆبوونه‌وه‌كه‌ خرایه‌ ڕوو كه‌ تیایدا‌ وه‌زیرى كاروبارى پێشمه‌رگه‌ ڕاپۆرتێكى تێروته‌سه‌لى له‌باره‌ى ڕه‌وشى سه‌ربازیى ئێستاى هه‌رێمى كوردستان و ئاماده‌كارییه‌كانى وه‌زاره‌ت بۆ ڕووبه‌ڕووبوونه‌وه‌ى تیرۆرستان و پاراستن و به‌رگریكردن له‌ سنووره‌كانى هه‌رێمى كوردستان و ناوچه‌ كوردستانییه‌كانى ده‌ره‌وه‌ى ئیداره‌ى هه‌رێمى كوردستان خسته‌ ڕوو، پاشان وه‌زیرى ناوخۆش ئاماژه‌ى به‌ ڕه‌وشى ئه‌منیى ئێستاى هه‌رێمى كوردستان كرد.

دواى گفتوگۆ و خستنه‌ڕووى سه‌ره‌نج و بیروڕا له‌ لایه‌ن وه‌زیرانه‌وه‌، ئه‌نجومه‌نى وه‌زیران دووپاتى كرده‌وه‌  كه‌ سیاسه‌تى هه‌رێمى كوردستان ئه‌وه‌یه‌ خه‌ڵك و خاكى هه‌رێمى كوردستان و ناوچه‌ كوردستانییه‌كانى ده‌ره‌وه‌ى ئیداره‌ى هه‌رێمى كوردستان بپارێزێت و نه‌بێته‌ لایه‌نێك له‌ هیچ پێكدادانێكى سه‌ربازیدا، به‌ڵكوو به‌ ته‌نیا به‌رگرى له‌ خۆى ده‌كات.

ئه‌نجومه‌نى وه‌زیران له‌م كۆبوونه‌وه‌یه‌دا بڕیارى دا لیژنه‌یه‌كى هه‌میشه‌یى بۆ دابینكردنى پێداویستیى لۆجستیى به‌ سه‌رپه‌رشتیى وه‌زیرى كارو‌بارى پێشمه‌رگه‌ و ئه‌ندامیه‌تیى وه‌زیرانى سامانه‌ سروشتییه‌كان، ئاوه‌دانكردنه‌وه و نیشته‌جێكردن‌، شاره‌وانى و گه‌شتوگوزار و ته‌ندروستى پێك دێت.

سه‌رۆك وه‌زیران داواى له‌ وه‌زیران كرد كه‌ سه‌ردانى مه‌یدانى بۆ پارێزگا و ناوچه‌ جیاوازه‌كان بكه‌ن و له‌گه‌ڵ به‌رێوه‌به‌رایه‌تییه‌ خۆجێییه‌كاندا كۆ ببنه‌وه‌؛ بۆ ئه‌وه‌ى له‌ نزیكه‌وه‌ ئاگادارى كێشه‌كان ببن و پێداویستییه‌كان ده‌ستنیشان بكه‌ن. ڕوونیشى كرده‌وه‌ كه‌ ئه‌م شێوازه‌ له‌ كابینه‌ى حه‌وته‌م تاقى كراوه‌ته‌وه‌ و ئه‌نجامى ئه‌رێنى هه‌بووه‌ بۆ دیاریكردنى كێشه‌ و پێدوایستییه‌كان و دابینكردن و چاره‌سه‌ركردنیان.

له‌ كۆتاییى كۆبوونه‌وه‌كه‌دا قوباد تاڵه‌بانى جێگرى سه‌رۆك وه‌زیران ئه‌م كۆبوونه‌وه‌یه‌ى وه‌ك یه‌كه‌م كۆبوونه‌وه‌ى كابینه‌ى تازه‌ى حكوومه‌ت به‌ ئه‌رێنى له‌ قه‌ڵه‌م دا و ئاماژه‌ى به‌وه‌ دا “ئه‌گه‌ر ئه‌م یه‌كڕیزى‌ و یه‌كده‌نگییه‌‌ بپارێزین، سه‌ركه‌وتوو ده‌بین و باشترین خزمه‌ت به‌ خه‌ڵكى كوردستان ده‌كه‌ین”.

10472143_329826657175144_1235084303682166501_o

دامەزراندنی کۆمەڵەی ئەکادیمیانی کوردستان لە ئیسپانیا

بۆ یەکەم جار، بە هاوکاری نوێنەرایەتی حکومەتی هەرێمی کوردستان، دامەزراندنی کۆمەڵەی ئەکادیمیانی کوردستان لە ئیسپانیا.
بە ئامادەبوونی دابان شەدەڵە نوێنەری حکومەتی هەرێمی کوردستان لە ئیسپانیا، لە بەرواری 17/6/2014 بەیەکگەیشتنێک لەگەڵ کۆمەڵێک لە خوێندکارانی بەرنامەی تواناسازی حکومەتی هەرێم لە ئیسپانیا لە نوسینگەی نوێنەرایەتی لە مەدرید ئەنجامدرا، بەبۆنەی تەواوبوونی وەرزی خوێندن و ئاگاداری لە رەوش و کاروباری خوێندکارانی کورد لە زانکۆکانی ئیسپانیا.
لەم بەیەکگەیشتنەدا خوێندکارانی کورد لە ئیسپانیا بۆ یەکەم جار هەستان بەراگەیاندنی کۆمەڵەیەکی سەربەخۆ بەناوی دامەزراندنی کۆمەڵەی ئەکادیمیانی کوردستان لە ئیسپانیا.شایانی باسە ئەمە یەکەم جارە لە مێژوی ئیسپانیادا کە کۆمەڵەیەکی کوردی تایبەت بە خوێندکاران دادەمەزرێت و لەم هەنگاوەدا نوێنەرایەتی کوردستان هاوکاری تەواوی مەعنەوی و رێنوانی یاسایی کردوون بەمەبەستی تۆمارکردنی یاسایی کۆمەڵەکە لە ئیسپانیا.
مەبەست لەم کۆمەڵەیە کۆکردنەوەی خوێندکارانی کوردە لە ژێر یەک چەتردا بەمەبەستی بە ئاگابوون لە کاروباری خوێندن و رەوشی یەکتر، دروستکردنی پردی پەیوەندی زانستی/ئەکادیمی لەگەڵ زانکۆکانی ئیسپانیا، هەروەک وەک ناوەندێک بۆ پێشکەشکردنی هاوکاری بۆ هەر خوێندکارێکی کورد لە ڕووی زانیاریەوە بەتایبەت بۆ ئەوانەی کە نوێ دێن و دەیانەوێت دەست بکەن بە خوێندن، یان هەر چالاکیەکی فەرهەنگی-زانستی کە خوێندکاران خۆیان بیانەوێت ئەنجامی بدەن.
لە کۆتایدا گفتوگۆ لەسەر کاروباری خوێندکاران بە شێوەیەکی گشتی کرا،بارودۆخی گشتی کوردستان و عێراق، هەروەها نوێنەرایەتی ئامادەبوونی خۆی دوپاتکردەوە بۆ هەر هاوکاریەک کە بتوانێت پێشکەشی بکات لە ئێستا و داهاتوودا.
pm_nb_oil__2014_06_19_h19m55s1__MZ

حكوومه‌ت پرسى سووته‌مه‌نى تاوتوێ ده‌كات و چه‌ند بڕیارێكی گرنگ ده‌دات

سه‌رله‌به‌یانیی ئه‌مڕۆ پێنجشه‌ممه‌ 19ی حوزه‌یرانی 2014، ئه‌نجومه‌نی هه‌رێم بۆ نه‌وت و غاز به‌ سه‌رۆكایه‌تیی نێچیرڤان بارزانی سه‌رۆك وه‌زیرانى هه‌رێمى كوردستان و به‌ ‌ئاماده‌بوونی قوباد تاڵه‌بانی جێگری سه‌رۆك وه‌زیران، كۆ بووه‌ و چه‌ند بڕیارێكی گرنگی ده‌رباره‌ى چاره‌سه‌ركردنی گرفتی سووته‌مه‌نی له‌ هه‌رێمى كوردستان ده‌ركرد.

له‌ كۆبوونه‌وه‌كه‌دا كه‌ به ‌به‌شداریی وه‌زیرانی دارایی و ئابوورى، سامانه‌ سروشتییه‌كان، پلاندانان و پارێزگارانی هه‌ولێر، سلێمانی، دهۆك و سه‌رپه‌رشتیارى ئیداره‌ی گه‌رمیان به ‌ڕێوه ‌چوو، سه‌رهه‌ڵدانى كێشه‌ی كه‌میی به‌نزین له‌ هه‌رێمی كوردستان و له‌و ناوچانه‌ی ئێستا له‌ژێر كۆنترۆڵی پێشمه‌رگه‌دان و هۆكاره‌كانی، به‌ تایبه‌تیش دوای ڕووداوه‌كانی مووسڵ، گفتوگۆى له‌باره‌وه‌ كرا.

له‌ كۆبوونه‌وه‌كه‌دا باس له‌وه‌ قه‌یرانه‌كه‌ له‌ سه‌رتاسه‌رى عیراق هه‌یه‌ و هه‌رێمى كوردستانیش كه‌وتۆته‌ ‌ژێر كاریگه‌ریى ئه‌و بارودۆخه‌ و داواكارییه‌كى زۆر له‌سه‌ر سووته‌مه‌نى‌ و به‌تایبه‌تیش به‌نزین له‌ شاره‌كانى دیكه‌ى ده‌روه‌ى هه‌رێمى كوردستان دروست بووه‌، به‌ تایبه‌تى به‌هۆى له‌كاركه‌وتنى پاڵاوگه‌ى بێجى كه‌ ئه‌مه‌ش واى كردووه‌ داواكارى له‌سه‌ر به‌نزین زۆر ببێت و ئه‌م قه‌یرانه‌ى لێ بكه‌وێته‌وه‌، بۆیه‌ پاڵاوگه‌كانى هه‌رێمى كوردستان له‌ توانایدا نیه‌ ئه‌م داواكارییه‌ له‌سه‌ر به‌نزین پر بكاته‌وه، ئه‌مه‌ بێجگه‌ له‌وه‌ى به‌ هۆى بارودۆخى ئه‌منى و سه‌ربازییه‌وه‌ به‌شێكى زۆرى سووته‌مه‌نیش به‌ تایبه‌تى به‌نزین بۆ هێزه‌كانى پێشمه‌رگه‌ ڕۆژانه‌‌ ده‌چێته‌ به‌ره‌كانى به‌رگرى له‌ سنووره‌كانى ناوچه‌ كوردستانییه‌كانى ده‌ره‌وه‌ى ئیداره‌ى هه‌رێمى كوردستان.

هه‌ر له‌م كۆبوونه‌وه‌یه‌دا ئه‌م بڕیارانانه‌ دران:
یه‌كه‌م: كردنه‌وه‌ى ده‌روازه‌كانى هه‌رێمى كوردستان بۆ هێنانى به‌نزین له‌ ڕێگه‌ى كه‌رتى تایبه‌ته‌وه‌ كه‌ به‌ شێوه‌ى بازرگانى و له‌ژێر چاودیریى وه‌زاره‌تى سامانه‌ سروشتییه‌كاندا بفرۆشرێت به‌ دوو مه‌به‌ست: یه‌كه‌میان كۆنترۆڵى كوالیتیى به‌نزینه‌كه‌، دووهه‌میشیان كۆنترۆلكردنى نرخه‌كه‌ى.

دووه‌م: ڕێكخستنه‌وه‌ى دابه‌شكردنى ئه‌و به‌نزینه‌ى له‌ پاڵاوگه‌كانى هه‌رێمى كوردستان به‌رهه‌م ده‌هێنرێت به‌ جۆرێك كه‌ به‌ باشترین شێوه‌ دابه‌ش بكرێت و به‌پێى پێویستى و تواناى پاڵاوگه‌كان به‌نزین بۆ ئوتومبیلى هاووڵاتیان دابین بكرێت. بۆ ئه‌م مه‌به‌سته‌ش كار ده‌كرێته‌وه‌ به‌ سیسته‌مى دابه‌شكردنى به‌نزین به‌ كۆبۆن كه‌ هه‌ر ئوتومبیلێك بڕێكى دیاریكراو له‌ به‌نزین وه‌ربگرێت و ئوتومبیله‌كانیش دابه‌ش بكرێنه‌ سه‌ر تاك و چووت. هه‌روه‌ها هه‌ردوو وه‌زاره‌تى سامانه‌ سروشتییه‌كان و دارایى و ئابوورى ڕاسپێردران بۆ دروستكردنى كۆبۆنێك كه‌ به‌ هیچ شێوه‌یه‌ك ساخته‌ نه‌كرێت.

سێیه‌م: مامه‌ڵه‌كردنى تایبه‌ت له‌گه‌ڵ تاكسى و پاس و ئه‌و ئوتومبیلانه‌ى له‌ هێڵى گشتیى نێوان شاروچكه‌كاندا كار ده‌كه‌ن كه‌ هه‌م به‌نزینخانه‌ى تایبه‌تیان بۆ دیارى بكرێت و هه‌م بڕى زیاتریشیان پێ بدرێت؛ به‌ مه‌رجێك به‌ڕێوه‌به‌رایه‌تییه‌كانى چاودێریى بازرگانى و وه‌زاره‌تى ناوخۆ كۆنتۆلى نرخى گواستنه‌وه‌ى هاووڵاتیان بكه‌ن و ئه‌م تایبه‌تمه‌ندییه‌ له‌ ئاساییبوونى نرخى گواستنه‌وه‌دا ڕه‌نگ بداته‌وه‌.

چواره‌م: گشت وه‌زاره‌ته‌كان ڕاسپێردران به‌ ڕێكخستنه‌وه‌ى به‌كارهێنانى ئوتومبیلى حكوومى و هه‌وڵدان بۆ به‌كارهێنانى كه‌مترین ڕێژه‌ى سووته‌مه‌نى به‌پێى پێویست.

هه‌ر له‌ كۆبوونه‌وه‌كه‌دا داوا له‌و هاووڵاتیانه‌ كرا كه‌ بارى داراییان باشه تاكو ئه‌م قۆناغه‌ ته‌واو ده‌بێت و قه‌یرانه‌كه‌ یه‌كجارى چاره‌سه‌ر ده‌كرێت، ‌وه‌ك به‌شدارییه‌ك له‌ چاره‌سه‌ركردنى قه‌یرانه‌كه‌دا، به‌نزینى بازگانى به‌كار بێنن و به‌مه‌ش بوار بڕه‌خسێنن هاووڵاتیانى كه‌مده‌رامه‌ت سوود له‌ به‌نزینخانه‌ حكوومییه‌كان و سیسته‌مى كۆبۆن وه‌ربگرن.
له‌ كۆبوونه‌وه‌كه‌دا هه‌روه‌ها سه‌رۆك وه‌زیران پارێزگاره‌كانى ڕاسپارد كه‌ هه‌ماهه‌نگى له‌گه‌ڵ یه‌كتردا بكه‌ن بۆ ئه‌وه‌ى ئه‌م بڕیارانه‌ له‌ هه‌موو پارێزگاكانى هه‌رێمى كوردستان وه‌ك یه‌ك جێبه‌جێ بكرێن.

دوایین شت له‌ كۆبوونه‌وه‌كه‌دا باس له‌ پرسى به‌نزینى فڕۆكه‌ش كرا و وه‌زیرى سامانه‌ سروشتییه‌كان جه‌ختى له‌وه‌ كرده‌وه‌ كه‌ ئه‌م پرسه‌ به ‌ته‌واوى چاره‌سه‌ر كراوه‌ و ئێستا له‌ فڕۆكه‌خانه‌كانى هه‌رێمى كوردستان به‌ هیچ شێوه‌یه‌ك هیچ جۆره‌ كێشه‌یه‌كى به‌نزینى فڕۆكه‌ نیه‌ و بڕى پێویستى به‌نزینى فڕۆكه‌ له‌ هه‌رێمى كوردستان هه‌یه و له‌مباره‌وه‌ هیچ كێشه‌یه‌ك نابێت‌.

ده‌رباره‌ى گازى شلیش وه‌زیرى سامانه‌ سروشتییه‌كان هاووڵاتیانى دڵنیا كرده‌وه‌ كه‌ بڕى پێویستى گازى شل له‌ هه‌رێمى كوردستان هه‌یه‌ و به‌ هیچ شێوه‌یه‌ك گرفێك له‌مباره‌ ڕوو نادات.

پاشان له‌ كۆنگره‌یه‌كی ڕۆژنامه‌وانیدا سه‌فین دزه‌یی گوته‌بێژی فه‌رمیی حكوومه‌تى هه‌رێمى كوردستان و پارێزگارانی هه‌ولێر، سلێمانی، دهۆك و سه‌رپه‌رشتیارى ئیداره‌ى گه‌رمیان ناوه‌ڕۆكى كۆبوونه‌وه‌كه‌یان بۆ ده‌زگاكنى ڕاگه‌یاندن خسته‌ ڕوو و وه‌ڵامى رۆژنامه‌نووسانیان دایه‌وه‌.

KRG_8th_cabinet_1024__2014_06_19_h7m30s36__DS

ده‌قى وتارى نێچیرڤان بارزانى له‌ ڕێوڕەسمی سوێندخواردنی كابینەی هەشتەمی حكومەت دا

به‌ڕێز سه‌رۆكى په‌رله‌مان،
به‌ڕێزان ئه‌ندامانى به‌ڕێزى په‌رله‌مانى كوردستان،
ئێواره‌تان باش..

ئه‌مڕۆ ئێمه‌ كابینه‌ی هه‌شتی حكوومه‌تی هه‌رێمی كوردستان له‌ هه‌لومه‌رجێكی زۆر ناسكدا ڕاده‌گه‌یه‌نین. هه‌ر چۆن ساڵی 2003 پێویستیمان به‌ یه‌كده‌نگی و هاوكاری و هه‌ماهه‌نگی هه‌بوو بۆ پاراستنی به‌رژه‌وه‌ندی و ده‌ستكه‌وته‌كانی هه‌رێمی كوردستان، له‌م ساته‌شدا كه‌ عێراق به‌ بارودۆخێكی سه‌ختدا تێپه‌ر ده‌بێت، هه‌مان بیركردنه‌وه‌ی ستراتیژیمان پێویسته‌ تا هیچ له‌و ده‌سكه‌وتانه‌ى كه‌ به‌ ده‌ستمان هێناوه‌، تا ژیانی هاووڵاتیان له‌  هه‌رێم و ناوچه‌ كوردستانییه‌كانى ده‌ره‌وه‌ى ئیدارى هه‌رێمى كوردستان بپارێزین، تا بڕیارمان له‌سه‌ر ئاستی به‌رپرسیاریه‌تیی مێژوودا بێت به‌رامبه‌ر به‌ خه‌ڵكی خۆشه‌ویستى كوردستان.

به‌ڕێزان،
كابینه‌ی هه‌شت كابینه‌ی هاوبه‌شی بنكه‌فراوانه‌ كه‌ گوزارشت له‌ خواستی هێز و لایه‌نه‌ سیاسییه‌كانی ناو هه‌رێمی كوردستان ده‌كات. ئه‌م ئه‌ركه‌ وای ده‌خواست به‌ ئارامی و نه‌فه‌سدرێژی مامه‌ڵه‌ له‌گه‌ڵ پێكهێنانی ئه‌م كابینه‌یه‌ بكه‌ین بۆ ڕێكه‌وتن له‌سه‌ر بنه‌مای هاوبه‌شیی ڕاسته‌قینه‌ له‌سه‌ر ئاستی ئه‌رك و پێداویستییه‌كانی ژیانی سیاسیی ئێستای هه‌رێمى كوردستان.

زۆر سوپاسی هاووڵاتیانی هه‌رێمی كوردستان ده‌كه‌م بۆ خۆڕاگرییان ده‌رباری پرۆسه‌ی پێكێهنانی ئه‌م كابینه‌یه‌، به‌تایبه‌تیش پاش ئه‌وه‌ی حكوومه‌تی فیدراڵ له‌ به‌غدا مووچه‌ی هه‌رێمی بڕی. ئه‌م كاره‌ ناهه‌قه‌‌ و دژی ده‌ستوورییه‌، ژیانی خه‌ڵكی هه‌رێمی كوردستانی گه‌لێك سه‌خت كردووه‌، كاریگه‌ریی خراپی له‌سه‌ر ئابووریی هه‌رێم و وه‌به‌رهێنان ‌هه‌یه‌. ئێمه‌ هاوسۆز و هاوخه‌می گشت گرفتی هاووڵاتیانی هه‌رێمى كوردستانین.

له‌ چه‌ند ساڵی داهاتوودا خۆڕاگریی ئێستای خه‌ڵكی كوردستان وه‌ك قۆناغێكی نوێی ڕووبه‌ڕووبوونه‌وه‌ی زوڵم له‌ قه‌ڵه‌م ده‌درێت. ئێمه‌ بێ وچان هه‌وڵی چاره‌سه‌ركردنی ئه‌م كێشانه‌ ده‌ده‌ین تا جارێكى تر تووشی قه‌یرانی سیاسی و دارایی نه‌بینه‌وه‌ له‌ هه‌رێمى كوردستان.

ئه‌م كابینه‌یه‌ هه‌وڵی ته‌واو ده‌دات بۆ به‌دامه‌زراوه‌كردنی حكوومه‌تێكی كارا و شه‌فاف. بنه‌مای هاووڵاتیبوون، جیاكردنه‌وه‌ی ده‌سه‌ڵات، ئاشتی و دادپه‌روه‌ریى كۆمه‌ڵایه‌تی، مافی مرۆڤ و به‌تایبه‌تى مافی ئافره‌ت و منداڵ، سه‌روه‌ریی یاسا و یه‌كسانی له‌ به‌رده‌میدا، دابینكردنی خۆشگوزه‌رانی، چاكسازیی هه‌مه‌لایه‌نه‌ و ڕاسته‌قینه‌، پاراستنی ژینگه‌ی كوردستان، دۆزینه‌وه‌ی چاره‌سه‌ری گونجاو بۆ به‌ره‌نگاربوونه‌وه‌ی هه‌موو جۆره‌ گه‌نده‌ڵییه‌ك له‌ داموده‌زگا و دامه‌زراوه‌كانی هه‌رێمى كوردستاندا.

هاووڵاتیبوون پره‌نسیپ و به‌ها و پێوه‌ری یه‌كه‌می كار و هه‌ڵسوكه‌وتی حكوومه‌ته له‌ دابینكردنی ماف و ده‌ستنیشانكردنی ئه‌رك و ڕه‌خساندنی ده‌رفه‌تى یه‌كسان و وه‌ك یه‌ك بۆ گشت دانیشتوانی هه‌رێمى كوردستان بێ جیاوازیی سیاسی و نه‌ته‌وه‌یی و ئایینی. كابینه‌ی هه‌شت به‌ پشتبه‌ستن به‌ میكانیزمی سه‌روه‌ریی یاسا و به‌ دامه‌زراوه‌بوون كار ده‌كات بۆ لێكجیاكردنه‌وه‌ی ده‌سه‌ڵات و ئه‌رك و به‌رپرسیاریه‌تیی حكوومه‌ت له‌ كار و چالاكیی حزبی.

كابینه‌ی هه‌شت كابینه‌ی حكوومه‌تی هاوبه‌شه‌، پێكهاته‌كانی ئه‌م كابینه‌یه‌ هاوبه‌شی ڕاسته‌قینه‌ن له‌ حكوومه‌دا، چ له‌ هه‌ڵسوكه‌وتی به‌ڕێكردنی ئه‌ركی حكوومه‌ت و چ له‌ بڕیاردان و، چ له‌ ئه‌ستۆگرتنی به‌رپرسیاریه‌تیی به‌رامبه‌ر گشت ئه‌و بریارانه‌ى كه‌ ده‌درێت. حكوومه‌ت موڵكی هه‌موو تاكێكی كوردستانه‌ و كار بۆ خۆشگوزه‌رانی و ده‌سته‌به‌ركردنی خزمه‌تگوزاری و به‌رژه‌وه‌ندییه‌كانی ده‌كات.

هاوبه‌شان له‌م كابینه‌یه‌دا به‌ڵێنیان له‌ ئاستی به‌رپرسیاریه‌تی و توانای ئابووری و دارایی و كارگێڕیی ده‌سه‌ڵاتی حكوومه‌تدا ده‌بێت‌ و پێكه‌وه‌ به‌رپرس ده‌بن له‌ بڕیاره‌كانی. هیچ لایه‌نێك نابێته‌ ڕێگر له‌ جێبه‌جێكردن و پیاده‌كردنی بڕیاره‌كانی.
ئێمه‌ وه‌ك لایه‌نه‌ هاوبه‌شه‌كانی پێكهاته‌ی ئه‌م كابینه‌یه‌ به‌ ده‌نگ و متمانه‌ی هاووڵاتیان، حكومڕانیی ئه‌م هه‌رێمه‌ ده‌كه‌ین، به‌ ئیراده‌یه‌كی به‌هێزه‌وه‌ كار ده‌كه‌ین بۆ هێنانه‌دی ئه‌و به‌ڵێنانه‌ی به‌ هاووڵاتیانمان داوه‌ و خزمه‌تیان ده‌كه‌ین.

كاركردنی چه‌ند حیزبێكی جیاواز له‌ حكوومه‌تی هاوبه‌ش ده‌كه‌ینه‌ هۆكارێك بۆ پته‌وكردنی بنه‌مای دیموكراسی له‌ كوردستاندا. پێكه‌وه‌ژیانی ئاشتی، ڕێزگرتن له‌ جیاوازیی بیروبۆچوون و ئازادیی ڕۆژنامه‌گه‌ری و حوكمڕانى له‌ژێر چه‌تری كاری هاوبه‌ش، سنگفراوانیی گه‌لی كوردستان ده‌باته‌ ئاستێكی نوێ له‌ مێژووی سیاسیماندا.

ئێمه‌ ده‌بێت هه‌نگاوی گه‌وره‌ بنێین بۆ به‌دیهێنانی خه‌ونی نه‌وه‌ی پێش خۆمان بۆ كوردستانێكی ئارام و سه‌قامگیر له‌ سایه‌ی ده‌سه‌ڵاتی خۆماڵیدا. ئێمه‌ به‌رپرسیارانه‌ داهاتووی خۆمان ده‌ستنیشان ده‌كه‌ین و هه‌نگاوی پێویستی بۆ ده‌هاوێژین.

به‌ڕێزان،
یه‌كێك له‌ ئه‌ركه‌كانی ئه‌م كابینه‌یه‌، گرتنه‌به‌ری سیاسه‌تی ئاشتیخوازانه‌ ده‌بێت بۆ چاره‌سه‌ر‌كردنی كێشه‌ چاره‌سه‌رنه‌كراوه‌كانی تا ئێستا و ئاینده‌ی هه‌رێم له‌گه‌ڵ حكوومه‌تی فیدڕاڵی عێراق، به‌تایبه‌تى كێشه‌ی ناوچه‌ كوردستانییه‌كانی ده‌ره‌وه‌ی ئیداره‌ى هه‌رێم و جێبه‌جێكردنی ماده‌ی 140ی ده‌ستوور. هه‌وڵ ده‌ده‌ین پێكه‌وه‌، به‌ هه‌ماهه‌نگی له‌گه‌ڵ سه‌رۆكایه‌تیی هه‌رێم و په‌رله‌مانی كوردستان و به‌ هاوكاریی لایه‌نه‌ سیاسییه‌كان، هه‌نگاوی ‌په‌له‌ بنێین بۆ دامه‌زراندنی ئه‌نجومه‌نێكی دانوستاندن بۆ ڕێكه‌وتنی سیاسیمان كه‌ گوزارشت له‌ ئیراده‌ی خه‌ڵكی كوردستان بكات.

كابینه‌ی هه‌شت زه‌مینه‌ی له‌بار ده‌ڕه‌خسێنی بۆ كاراكردنی ڕۆڵی چاودێریی په‌رله‌مان له‌سه‌ر كاری حكوومه‌ت. له‌ هه‌مان كاتدا ئێمه‌ داوای متمانه‌ و پاڵپشتیی په‌رله‌مان ده‌كه‌ین تا پێكه‌وه‌ خزه‌مه‌تی چاوه‌ڕوانكراوی هاووڵاتیانى هه‌رێمى كوردستان بكه‌ین. كابینه‌ی هه‌شت په‌یوه‌ندی و هاوكاری و هه‌ماهه‌نگیی به‌رده‌وام و پته‌وى له‌گه‌ڵ په‌رله‌مانی هه‌رێمی كوردستان و ده‌سته‌ی سه‌رۆكایه‌تیی په‌رله‌ماندا ده‌بێت.

هه‌رێمی كوردستان ناوچه‌یه‌كی تا ڕاده‌یه‌ك ده‌وڵه‌مه‌نده،‌ بۆیه‌ ئامانجمان به‌دیهێنانی به‌رده‌وام و جۆراوجۆركردنی سه‌رچاوه‌كانی داهات و خۆنه‌به‌ستنه‌وه‌‌ به‌ تاكه‌ سێكته‌ری نه‌وته‌ له‌م هه‌رێمه‌دا. كار ده‌كه‌ین بۆ گه‌شه‌پێدانی كه‌رتی كشتوكاڵ و پشه‌سازی و بازرگانی و خزمه‌تگوزاری و كه‌مكردنه‌وه‌ی جیاوازیی هه‌لومه‌رجی ژیانی گوند و شار.

به‌رزكردنه‌وه‌ی ئاستی خزمه‌تگوزارییه‌ سه‌ركییه‌كانی كار و ئاو و كاره‌با و ڕێگاوبان كه‌ گونجاو بێت له‌گه‌ڵ گه‌شه‌ی ئابووریی به‌رچاوی كوردستان و به‌رزكردنه‌وه‌ی ئاستی بژێوی تاك و په‌ره‌سه‌ندنی وه‌به‌رهێنانی خۆماڵی و بیانی له ‌ڕێی به‌گه‌ڕخستنی ته‌واوی توانا و سه‌رمایه‌ی ماددی و مرۆیی له‌ هه‌رێمى كوردستان. له‌م بواره‌دا ده‌بێت ئێمه‌ چالاكانه‌ كار بكه‌ین بۆ جێبه‌جێكردن و چه‌سپاندنی لامه‌ركه‌زی، جیاكردنه‌وه‌ی ده‌سه‌ڵاته‌كان، ڕێككه‌وتن له‌سه‌ر هه‌مواركردنی ئه‌و یاسایانه‌ی ڕه‌هه‌ندی نیشتیمانییان هه‌یه‌ له‌ وڵاته‌كه‌ماندا.

گرنگی ده‌ده‌ین به‌ كه‌رتی پیشه‌سازی و گه‌شتوگوزار. پشتگیریی كه‌رتی تایبه‌ت ده‌كه‌ین بۆ ئه‌وه‌ی ڕۆڵی خۆی ببینن له‌ ئاوه‌دانكردنه‌وه‌ و گه‌شه‌ی ئابوورى له‌ هه‌رێمى كوردستاندا. په‌ره‌ ده‌ده‌ین به‌ سیاسه‌تی وه‌به‌رهێنان له‌ كوردستان به‌ شێوه‌یه‌ك كه‌ گونجاو بێت له‌گه‌ڵ گه‌شه‌ی ئابووری و كۆمه‌ڵایه‌تیی قۆناخی داهاتووی كوردستان.

له‌ به‌رنامه‌ی كابینه‌ی هه‌شتدا به‌رده‌وام ده‌بین له‌سه‌ر چاكسازیی سیسته‌می په‌روه‌رده‌ و خوێندنی باڵا و فێركردن به‌ دابینكردنی پێداویستییه‌كانیان و به‌رزكردنه‌وه‌ی ئاستی زانستیی مامۆستایان. بایه‌خ ده‌ده‌ین به‌ توێژینه‌وه‌ی زانستی و‌ خوێندنی پێشه‌یی به‌مه‌به‌ستی فه‌راهه‌مكردنی ده‌ستی كاری كارامه‌ و به‌توانا بۆ بازاڕی كار و كه‌مكردنه‌وه‌ی ڕێژه‌ی نه‌خوێنده‌واری له‌ هه‌رێمدا.

هه‌روه‌ها له‌ كه‌رتی ته‌ندروستیشدا كار ده‌كه‌ین بۆ په‌یڕه‌وكردنی سیسته‌می ته‌ندروستیی پێشكه‌وتوو و جیاكردنه‌وه‌ی كه‌رتی گشتی و تایبه‌ت له‌ خزمه‌تگوزارییه‌كانی ته‌ندروستیدا. كابینه‌ی هه‌شت ئاوڕى زیاتر له‌ ژیان و گوزه‌رانی كه‌سوكاری شه‌هیدان و قوربانیانی ئه‌نفال و كیمیاباران و زیندانیانی سیاسی ده‌داته‌وه‌، كار ده‌كه‌ین بۆ باشتركردنی ژیان و گوزه‌رانیان. كار ده‌كه‌ین بۆ ڕێكخستنه‌وه‌ی به‌رنامه‌ی نیشته‌جێبوون به‌ شێوازێكی هاوچه‌رخ و چاره‌سه‌ركردنی كێشه‌ی نیشته‌جێبوون به‌تایبه‌تی بۆ چین و توێژه‌ كه‌مده‌رامه‌ته‌كان.

ئێمه‌‌ شانازی به‌م بارودۆخه‌ ئارام و ئاسایشه‌ ده‌كه‌ین كه‌ له‌ جه‌رگه‌ی ناوچه‌یه‌كی پڕ توندوتیژی و شه‌ڕ و تیرۆر و تۆقاندندا به‌ هیممه‌ت و وریایی و كاری دڵسۆزانه‌ی هێزی پشمه‌رگه‌ و پۆلیس و ئاسایش بۆ هه‌موو خه‌ڵكی كوردستان ده‌سته‌به‌ر كراوه‌. له‌م ڕوانگه‌یه‌وه‌ حكوومه‌تی هه‌رێم كار ده‌كات بۆ باشتركردنی ژیان و گوزه‌رانی هێزه‌ چه‌كداره‌كانی هه‌رێم و به‌رزكردنه‌وه‌ی ئاست و توانا و لێهاتووییان، به‌نیشتمانیكردنیان ئه‌ركی گرنگی ئه‌م كابینه‌یه‌ ده‌بێت.

كابینه‌ی هه‌شت هه‌وڵ ده‌دات به‌ ڕێكاری یاسایی چاو به‌ سیسته‌می خانه‌نشینی و مووچه‌دا بخشێنێته‌وه‌، به‌ جۆرێك كه‌ هاووڵاتیان به‌ شێوه‌یه‌كی دادپه‌روه‌رانه‌ لێی سوودمه‌ند بن. هاوبه‌شان له‌م كابینه‌یدا كار ده‌كه‌ن بۆ دروستكردنی سندووقی كوردستان بۆ داهاتی نه‌وت و دامه‌زراندنی كۆمپانیای نه‌وتی هه‌رێم وه‌ك له‌ یاسای ژماره‌ (22)ی 2007ی تایبه‌ت به‌ نه‌وت و گازی هه‌رێمدا هاتووه‌.

كابینه‌ی هه‌شت به‌رده‌وام ده‌بێت له‌ په‌ره‌پێدان و هاوكاری و هاندانی كه‌رتی تایبه‌تی ناوخۆ و ڕه‌خساندنی هه‌لومه‌رجی گونجاو بۆ كۆمپانیا و سه‌رمایه‌گوزارانی ده‌ره‌وه‌ به‌مه‌به‌ستی فه‌راهه‌مكردنی ده‌رفه‌تى كار و كه‌مكردنه‌وه‌ی ڕێژه‌ی بێكاری، به‌تایبه‌تى له‌ ناو چینی گه‌نج و ده‌رچووی په‌یمانگه‌ و زانكۆكاندا، به‌ گرتنه‌به‌ری سیاسه‌تی كارپێكردنی سه‌رده‌میانه‌ و ڕێگرتن له‌ پاوانكاریی بازاڕ و كۆمپانیا و پڕۆژه‌ی وه‌به‌رهێنان.

به‌ڕێزان،
ئه‌وه‌ی لێره‌دا ئاماژه‌م پێ كرد، هێڵه‌ گشتییه‌كانی كارنامه‌ی حكوومه‌تی هاوبه‌شه‌، ورده‌كاریی ئه‌م كارنامه‌یه‌ ده‌بێته‌ پلان و پڕۆژه‌ و پڕۆگرامی سیاسه‌تگوزاریی گشتیی حكوومه‌ت و له‌ كار و به‌رنامه‌ی وه‌زاره‌ته‌كاندا به‌ ته‌واوه‌تى هه‌وڵ ده‌ده‌ین ڕه‌نگ ده‌داته‌وه‌.

له‌ كۆتاییدا پیاده‌كردن و سه‌ركه‌وتنی پرۆگرامی حكوومه‌ت، سه‌ركه‌وتنی هاووڵاتیی خۆڕاگر و ناخۆشیدیده‌ی كوردستانه‌. خزمه‌تی كۆمه‌ڵایه‌تی و ئابووری، سه‌رفرازیی حكوومه‌ت ده‌بێت. دانیشتوانی كوردستان شایسته‌ی ئاینده‌یه‌كی گه‌شترن، شایسته‌ی ئازادی، سه‌ربه‌ستی و دیموكراسیی پته‌وترن. به‌ پشتیوانیی هێزی ئاسایش و پێشمه‌رگه‌ و پۆلیس و هاووڵاتیان، ده‌توانین ئه‌نجامی باشتر به ‌ده‌ست بهێنین، خه‌ونی گه‌وره‌تر بهێنینه‌ دى.

جارێكی دیكه‌ش زۆر سوپاستان ده‌كه‌م.